Հունվարի 29-ին Տավուշի մարզի առաջին ատյանի դատարանի Բերդի նստավայրում նշանակված է Սիմոն Դարվինի Հարությունյանի դատավարության անդրանիկ նիստը: Նրան մեղադրանք է առաջադրվել այն բանի համար, որ նա 2018 մայիսի 7-ից 8-ն ընկած ժամանակահատվածում բնության հատուկ պահպանվող տարածք հանդիսացող «Դիլիջան ազգային պարկ» ՊՈԱԿ-ի տարածքում Տավուշի մարզի Թեղուտ գյուղի բնակչի «Ստալինեց» մակնիշի թրթուրավոր տրակտորով, նույն գյուղի մի խումբ բնակիչների խնդրանքով, առանց համապատասխան թույլտվության, ապօրինի մտել է ազգային պարկի տարածք եւ վերանորոգել խորհարքեր տանող ավտոճանապարհը, որի ընթացքում 380 մետր երկարության, միջինը 3.5 մետր լայնության, 0.35 մետր միջին խորության անտառամիջյան նոր ճանապարհ կառուցելով՝ դեգրացիայի է ենթարկել հողի շերտը, դիտավորությամբ պետությանը պատճառելով 384 789 դրամի վնաս:
Բացի այդ, նա մեղադրվում է այն բանում, որ ճանապարհի վերանորոգման ընթացքում, ծառերի ապօրինի հատում կատարելու դիտավորությամբ, առանց համապատասխան թույլտվության, նշված տրակտորով հրել եւ արմատախիլ է արել՝ մինչեւ աճի դադարեցման աստիճան վնասել է 39 հատ տարբեր տեսակի թաց կանգուն ծառ՝ պետությանը պատճառելով 2 միլիոն 127 հազար 500 դրամի վնաս:
Ս. Հարությունյանին մեղադրանք է առաջադրվել ՀՀ քրեական օրենսգրքի 296 հոդվածի 3-րդ մասով եւ 298 հոդվածով: Նրա նկատմամբ խափանման միջոց է ընտրվել չհեռանալու մասին ստորագրությունը:
Ոսկան ՍԱՐԳՍՅԱՆ
