Այսօր լրագրողների հետ հանդիպման ժամանակ առողջապահության նախարար Արսեն Թորոսյանն անդրադարձավ նախարարության կառուցվածքային օպտիմալացմանը:
«Բարեբախտաբար, մեր ենթակա հիմնարկներում դուբլիկատ ֆուկցիաներով հիմնարկներ չենք ունեցել: Մեր մի քանի ՊՈԱԿ-ները «սպեցիֆիկ», ռազմավարական ֆունկցիաներ կատարող հիմնարկներ են: Օրինակ՝ մարդասիրական օգնության հանրապետական կենտրոնը, դեղերի փորձագիտական կենտրոնը: Այս պահին այս կառույցի օպտիմալացման հարցը դրված չէ: Դրված է դրանց աշխատանքի արդյունավետության բարձրացման հարցը»,-ասաց Թորոսյանը:
Որոշ հիմնարկներ, ինչպես ասաց Թորոսյանը, հնարավոր է միաձուլվեն, բայց այս պահին որոշում չկա. «Բայց նախարարության կառուցվածքն ինքնին փոխվելու է միանշանակ: Մենք շուտով սկսելու ենք գործընթաց՝ ֆունկցիաները հասկանալու եւ նոր կառուցվածք գծելու: Կառուցվածքը գծելու արդյունքում հնարավոր է որոշակի միացումներ լինեն: Օրինակ՝ մի քանի բաժինները միանան, դառնան վարչություն եւ որոշվի, որ այդտեղ ոչ թե ասենք՝ 15 հոգի պիտի լինի, այլ՝ 12»:
Օպտիմալացման արդյունքում սպասվող կրճատումներին անդրադառնալով, Թորոսյանն ասաց, որ հնարավոր է պարզվի, ասենք՝ 210 աշխատակցի փոխարեն, նոր կառուցվածքը գծելու արդյունքում, գործառույթները կարող են կատարել ընդամենը 160 աշխատակիցներ»:
Նելլի ԲԱԲԱՅԱՆ
