«Մայրապետյանի գործով առողջապահության նախարարության ներկայացուցիչը համագործակցում է ՄԻԵԴ-ի, դատախազության եւ հատուկ քննչական ծառայության հետ եւ իմ մասնագիտական եզրակացությունը տրվել է այս մարմիններին»,-այսօր այս մասին ասաց առողջապահության նախարար Արսեն Թորոսյանը:
Հատուկ քննչական ծառայությունը գործարար, Հ2 հեռուստաընկերության սեփականատեր Սամվել Մայրապետյանի նկատմամբ մեղադրանք էր առաջադրել ՀՀ քրեական օրենսգրքի 38-311 հոդվածի հատկանիշներով՝ «կաշառք ստանալուն օժանդակելը»: 30 մլն գրավի դիմաց նրա խափանման միջոցը փոխվել է:
Մայրապետյանը առողջական խնդիրները լուծելու համար դիմել էր Եվրոպական դատարան, խնդրել ՀՀ իշխանություններին պարտավորեցնել վերադարձնել իր անձնագիրը և թույլատրել Գերմանիայի Դաշնային Հանրապետությունում գտնվող իր կողմից մատնանշված բուժհաստատությունում բուժման նպատակով անհապաղ մեկնել երկրից: ՀՀ դատախազությունը վստահեցնում է՝ ՄԻԵԴ-ը Սամվել Մայրապետյանի իրավունքի խախտման փաստ չի արձանագրել:
ՀՔԾ-ն Մայրապետյանի անձնագիրը վերադարձրել է, սակայն նա չի կարող երկրից դուրս գալ:
Արսեն Թորոսյանը Մայրապետյանի առողջական վիճակի եւ դրսում բուժօգնություն ստանալու մասին այսօր ասաց. «Ես վստահ չեմ, որ հիմա կարող եմ բժշկական գաղտնիք բացահայտել, բայց այն դիրքորոշումները, որոնք հայտնում են քննչական մարմինները, ներառում է մեր դիրքորոշումը, հետեւաբար նրանց ասածը կարդալուց կարող եք հաշվի առնել, որ մենք մեր կարծիքը տվել ենք իրենց»:
Լրագրողի դիտարկմանը՝ այսինքն՝ Սամվել Մայրապետյանը կարո՞ղ է տրանսլումինալ դրենավորման ենթարկվել, Արսեն Թորոսյանն արձագանքեց՝ «Իսկ Դուք գիտե՞ք դա ինչ է, մենք մեր դիրքորոշումը հայտնել ենք»:
Լրագրողների պնդմանը՝ Հայաստանում նշված բուժական մեթոդը երբվանի՞ց է կիրառվում, քանի որ մասնագետներն ասում են, որ այն մեր երկրում չի կիրառվում, Թորոսյանը պատասխանեց. «Իսկ դուք վստա՞հ եք, որ նրան այդ մեթոդն է ցուցված հիմա»։ Կրկնում եմ՝ մեր դիրքորոշումը հայտնվել է, քննչական մարմինները եւ դատախազությունը պատասխանելով ՄԻԵԴ-ին եւ փաստաբանական խմբին, հիմնվում են նաեւ մեր կարծիքի վրա»:
Նելլի ԲԱԲԱՅԱՆ
