Երեկ Երեւանի քաղաքապետարանը հայտարարեց՝ մայրաքաղաքի ձնամաքրման աշխատանքները պատշաճ կազմակերպելու համար քաղաքապետարանը 9 նոր հատուկ տեխնիկա է ձեռք բերել: Մրցույթում հաղթող է ճանաչվել ռուսաստանյան «ԿամԱԶ» ընկերությունը: Ասում են՝ նոր գույքի հնարավորություններին Երեւանի քաղաքապետ Հայկ Մարությանն անձամբ է ծանոթացել: Քաղաքապետարանը վստահեցնում է, որ նոր տեխնիկան ձնամաքրումից բացի, նաեւ աղ ու ավազ ցանելու համար է նախատեսված:
Լուսանկարում Մալաթիա-Սեբաստիա վարչական շրջանի ընդամենը մի քանի «սառած» փողոցներն են, տեղ-տեղ՝ մերկասառույցով: Այսպիսի սառցակալած փողոցներ այս համայնքում՝ որքան ուզեք, շատ-շատ են: Բնակիչներն ամեն տարի ձյան տեղումներից հետո այս փողոցներով վախվորած են քայլում. հաճախ սայթաքում, ընկնում են եւ վնասվածք ստանում: Մեքենաներն էլ կտրուկ թեքությամբ այս փողոցները հազիվ են հաղթահարում: Թե թաղապետարանում ինչ են անում ձյան ու սառույցի դեմ պայքարելու համար կուտակած աղն ու ավազը՝ հայտնի չէ. համենայնդեպս, ինչ ձյուն է տեղացել, այստեղ ո՛չ աղ, ոչ էլ ավազ են շաղ տվել: Այս թաղամասը քաղաքային նախկին իշխանությունների օրոք էլ անտեսված էր մնում: Քաղաքային նոր իշխանությունները վստահեցնում են՝ «Նոր ձնամաքրիչ մեքենաները տեղ են հասել»: Պահեստում չե՞ն մնա, «ԿամԱԶ»-ներից մեկը կհասնի՞ այս թաղամաս: Թեեւ պետք է նշել՝ առանց «ԿամԱԶ»-ի էլ հնարավոր է մի քանի դույլ աղ-ավազով «վնասազերծել» այս փողոցները:
Լուսանկարները՝ ՆԵԼԼԻ ԲԱԲԱՅԱՆԻ
«Առավոտ» օրաթերթ,
22.01.2019
