ՌԳԱ համաշխարհային տնտեսության և միջազգային հարաբերությունների ինստիտուտի գլխավոր գիտաշխատող, կովկասագետների գիտական միության նախագահ Ալեքսանդր Կռիլովը փաստում է, որ Բելառուսի եւ Ղազախստանի ջանքերը`ՀԱՊԿ գլխավոր քարտուղարի հարցն անպայմանորեն դեկտեմբերին լուծել`իրենց նախատեսած սցենարով, տապալվեցին: Մինչդեռ, ըստ ռուս քաղաքագետի, դրա համար բավական ջանք էր ներդրվել: Բանախոսը վստահ է, հարցը վերջնական լուծում կստանա կազմակերպության «կուլուարներում»:
«Սպուտնիկ Արմենիա» մամուլի կենտրոնում կայացած Մոսկվա-Երևան «Քաղաքական նոր շրջանի մեկնարկ Հայաստանում. հայ հասարակության սպասումները նոր իշխանությունից» թեմայով տեսակամուրջի ժամանակ, հայաստանցի լրագրողները ռուս վերլուծաբանից հետաքրքրվեցին`իր կարծիքով ՀԱՊԿ գլխավոր քարտուղարի պաշտոնի շուրջ առաջացած սկանդալն ի վերջո, հանգուցալուծման ի՞նչ տարբերակներ ունի:
«Եթե Հայաստանին հաջողվի սրբագրումներ մտցնել ՀԱՊԿ-ի կանոնադրության մեջ, որոնք կնախատեսեն կառույցի գլխավոր քարտուղարի ետկանչի մեխանիզմներ եւ նոր գլխավոր քարտուղարի ընտրության կարգը, ապա միանգամայն հնարավոր է, որ Երեւանն այդ հիմքով կրկին ղեկավարի մինչեւ նախատեսված ժամկետի ավարտը: Ես կարծում եմ, որ սա ամենահավանական տարբերակն է»,- ասաց Ալեքսանդր Կռիլովը:
Հաջորդ հավանական սցենարն, ըստ վերլուծաբանի, ՀԱՊԿ գլխավոր քարտուղարի պաշտոնակատար Վալերի Սեմերիկովի պաշտոնավարման շարունակումն է: Վերլուծաբանը տեսնում է նաեւ երրորդ տարբերակը`այդ պաշտոնում Բելառուսի ներկայացուցչի ընտրությունը, եթե Ալեքսանդր Լուկաշենկոն շարունակի դա պնդել: Ինքը`Ալեքսանդր Կռիլովը, դա քիչ հավանական է համարում, քանզի Հայաստանը դեմ է այդ տարբերակին:
Լրագրողներն անդրադարձան նաեւ ԼՂՀ հարցի կարգավորման շուրջ նկատվող աշխուժությանը: Մասնավորաբար, երկու երկրների արտգործնախարարների վերջին հանդիպումից հետո, ԵԱՀԿ Մինսկի խմբի համանախագահների տարածած հայտարարության մեջ կոչ էր արվում կողմերին` «բնակչությանը խաղաղության նախապատրաստելուն ուղղված» քայլեր ձեռնարկել: Նման դիտարկում կար նաեւ ԱՄՆ նախագահ Դոնալդ Թրամփի`վարչապետի պաշտոնում նշանակման առիթով Նիկոլ Փաշինյանին ուղղված շնորհավորանքի մեջ: Այս համատեքստում, Ալեքսանդր Կռիլովը հիշեց Ադրբեջանում ԱՄՆ նախկին դեսպան Մեթյու Բրայզային, որն անընդհատ հայտարարում էր, որ ԼՂՀ հարցը եկող տարի կլուծվի: Նա նկատեց`բանակցությունները կարող են հարյուրամյակներով շարունակվել, նախադեպեր կան, բայց հարցի կարգավորում հնարավոր է միայն կողմերի փոխըմբռնման պարագայում: Առայժմ, երբ կողմերը հակադիր ուղղություններով են շարժվում, բանախոսը «քաղաքական ինքնասպանություն» է որակում ցանկացած հայտարարություն`ներկայիս դիրքերը զիջելու մասին: Եվ այն, որ Նիկոլ Փաշինյանի հակառակորդները փորձում են ներկայացնել, թե նա այնուհանդերձ զիջելու է հայկական կողմերի ներկայիս դիրքերը, Ալեքսանդր Կռիլովը համարում է «սպեկուլյացիա»:
Այլ մանրամասները`տեսանյութում
Նելլի ԳՐԻԳՈՐՅԱՆ
