Անդրիաս Ղուկասյանի գործով հերթական դատական նիստն այսօր էլ չկայացավ: Այս մասին Aravot.am-ի հետ զրույցում ասաց Անդրիաս Ղուկասյանի շահերի պաշտպան Կարեն Մեժլումյանը: Նրա ներկայացմամբ՝ գործով տուժող ՊՊԾ գնդի գրավման ժամանակ ենթադրաբար պատանդառված բուժքույր Մալինա Մարգարյանը (լուսանկարում) չէր ներկայացել դատարան՝ ցուցմունք տալու:
«Դատարանը որոշում կայացրեց Մալինա Մարգարյանին բերման ենթարկել հաջորդ նիստին»,-ասաց փաստաբանը: Ըստ նրա, նիստը հետաձգվեց 2 շաբաթով:
Սա Մալինա Մարգարյանին բերման ենթարկելու դատարանի արդեն 2-րդ որոշումն է:
Անցյալ տարի, դեկտեմբերի 18-ի նիստին էլ այս գործով տուժողներից ոստիկանը եւ ՊՊԾ գնդի գրավման ժամանակ պատանդառված բուժքույր Մալինա Մարգարյանը դատական նիստին չէին ներկայացել: Այդ նիստին դատարանը որոշեց այսօրվա նիստին ցուցմունք տալու համար Մալինա Մարգարյանին բերման ենթարկել:
Հիշեցնենք, Մալինա Մարգարյանի՝ ցուցմունք տալու վերաբերյալ Կարեն Մեժլումյանն Aravot.am-ի հետ զրույցում ասել էր՝ «Աբսուրդ է, որ Անդրիաս Ղուկասյանին մեղադրում են ՊՊԾ գնդին միանալու փորձ կատարելու համար: Մալինա Մարգարյանը պետք է պատմի, թե ինչ է կատարվել ՊՊԾ գնդի ներսում, երբ ինքն այնտեղ է եղել, սա ի՞նչ կապ ունի Անդրիաս Ղուկասյանի հետ: Նրան մեղադրում են, թե փորձել է միանալ խմբին, զինվել եւ պատանդառված պահել Մալինա Մարգարյանին եւ մյուս բուժաշխատողներին: Մեղադրող-կողմի որեւէ փաստ հիմնավոր չէ»:
Նելլի ԲԱԲԱՅԱՆ
