«Այդ 5000 դրամները միանշանակ հանվելու են»,- Aravot.am-ի հետ զրույցում վստահեցրեց «Փրո Փոուզ» կենդանապաշտպան բարեգործական կազմակերպության հայաստանյան ներկայացուցիչ Նարե Արամյանը՝ անդրադառնալով «Տեղական տուրքերի և վճարների մասին» ՀՀ օրենքով սահմանված յուրաքանչյուր տնային կենդանու համար տարեկան 5000 դրամ վճարին:
Նրա խոսքով, իրենք քաղաքապետարանի հետ Ազգային ժողովին առաջարկել են խմբագրել օրենքը՝ բերելով հին տարբերակին՝ 0-5000 դրամ վճար սահմանելով. Նարե Արամյանի խոսքով, թիվը չի կարող ֆիքսված լինել. «Տեղական տուրքի կարիք այս պահին չունենք, հատկապես, պետք է ամբողջությամբ ձեւակերպված լինի՝ ինչի դիմաց է տուրքը տրվում, մենք ունենք շատ տարբեր գործողություններ մինչ հարկման դաշտ մտնելը…յուրաքանչյուր վարչական շրջանում՝ առանձնացված կանաչ տարածքներում, պետք է ունենալ զբոսանքի վայրեր, դա պահանջներից մեկն է՝ կենդանիների գրանցմանը զուգահեռ: Ինչ վերաբերում է ՝ ինչի դիմաց պետք է լինի տուրքը, խնդիրը ոչ թե տուրք ունենալն է, այլ պետք է լինեն պարտադիր պայմաններ, որոնց բավարարման դեպքում միայն բնակիչները իրավունք կունենան պահել ընտանի կենդանիներ»:
Արփինե ՍԻՄՈՆՅԱՆ
