Տնային կենդանիներին պահելու համար սահմանված պետական տուրք վճարելու մասին որոշումից դժգոհ կենդանասերներն այսօր բողոքի ցույց անցկացրին Երևանի քաղաքապետարանի դիմաց:
«Եթե պայմաններ չկան, ի՞նչ 5000 դրամ տուրքի մասին է խոսքը: Կենդանասերները պետք է տեսնեն՝ ինչի համար են վճարում, ինչի համար է օրենքը կիրառվում: Բոլորի պահանջն է, որ լինի օրենք, ոչ ոք չի ասում՝ մենք չենք ուզում վճարել, այդ 5000 դրամը լուրջ գումար չէ, հարցը դա չէ: Հարցն այն է, որ չկա կենդանիների վերաբերյալ օրենք: Մենք պահանջում ենք, որ լինի հստակ օրենք, և այդ օրենքի մշակմանը մասնակցեն մասնագետները, որոնք լուրջ խորհրդատվություն կտան»,- ասաց բողոքի ցույցի մասնակից Ստեփան Զաքարյանը:
«Տեղական տուրքերի և վճարների մասին» ՀՀ օրենքի համաձայն, այսուհետեւ յուրաքանչյուր տնային կենդանու համար տարեկան պետք է վճարել 5000 դրամ:
3 շուն խնամող Հովհաննես Գևորգյանն էլ դժգոհեց, որ կենդանիների զբոսանքի համար նախատեսված այգիներ չկան, տարրական այլ պայմաններ, ասաց՝ ինքը պատրաստ է տուրք վճարել, եթե պայմաններ ստեղծեն և ասեն, թե ինչի՞ համար պետք է այդ տուրքը վճարվի։
Երևանի քաղաքապետ Հայկ Մարությանի մամուլի քարտուղար Հակոբ Կարապետյանն էլ հայտարարեց, որ քաղաքապետարանը դեռ անցյալ տարվա վերջից է սկսել քննարկումները. «Քննարկվում է այնպիսի մոդել, որտեղ իրենց հարմարավետ ու անվտանգ կզգան և´ մարդիկ, և´ կենդանիները: Հիմա արդեն գործնական քննարկումների փուլում ենք գտնվում: Խոսքը վերաբերում է ինչպես տնային, այնպես էլ անտուն կենդանիներին: Քննարկվում է կենդանիների ստերջացման, չիպավորման միջոցով հաշվառման, անտուն կենդանիների համար կացարանների հարցերը: Լուծումները կառաջարկվեն քննարկումների արդյունքում»,- ասաց նա:
Հակոբ Կարապետյանի խոսքով, Երևանի ավագանին ուղղակի «Տեղական տուրքերի և վճարների մասին» օրենքի պահանջն է կատարել՝ սահմանելով 5000 դրամ տուրքը: Իսկ օրենքը, հիշեցնենք, ընդունվել է 2006-ին:
«Այս տուրքն արդյունավետ չի գործել ընդունման օրից ի վեր և այս պահին ևս արդյունավետ չի կարող լինել, որովհետև քննարկվում են արմատապես նոր մոտեցումներ: Հաշվի առնելով անարդյունավետության ընկալումը՝ տուրքը փաստացի այս պահին չի գործում և այդ տուրքն այս պահին չի գանձվելու»,- ասաց Հակոբ Կարապետյանը:
Իսկ տուրքը ավագանու կողմից չէր կարող վերացվել, քանի որ տուրքի պահանջը բխում է օրենքից:
Արփինե ՍԻՄՈՆՅԱՆ
