«Արմավիր» քրեակատարողական հիմնարկում կիրակի օրը հանկարծամահ է եղել դատապարտյալներից մեկը։ ՀՀ ԱՆ քրեակատարողական ծառայության հանրային կապերի բաժնի պետ Նոնա Նավիկյանին խնդրեցինք ճշտել՝ ո՞րն է եղել մահվան պատճառը:
Ի պատասխան նա փոխանցեց հետեւյալ հաղորդագրությունը. «Հունվարի 20-ին՝ ժամը 18։00-ի սահմաններում, ՀՀ ԱՆ «Արմավիր» քրեակատարողական հիմնարկի դատապարտյալ Ս. Սահակյանի (դատապարտվել էր ՀՀ քրեական օրենսգրքի 188 հ. 1-ին մասով, 258 հ. 3-րդ մասով, 104 հ. 1-ին մասով, 34-268 հ. 1-ին մասով 11 տարի 6 ամիս ազատազրկման։ Նախկինում 2 անգամ դատապարտված է եղել սույն գործով) ինքնազգացողությունը կտրուկ վատացել է, և քրեակատարողական հիմնարկ ժամանած շտապօգնության բժիշկների կողմից արձանագրվել է վերջինիս կենսաբանական մահը։
Փաստի առթիվ կատարվում է նախաքննություն, նշանակվել է դատաբժշկական փորձաքննություն»:
Հավելենք, որ դատապարտյալ Սահակ Սահակյանը 37 տարեկան էր, ունի մեկ տղա։ Մեր տեղեկություններով՝ շտապօգնության բրիգադը կանչ ստանալուց հետո բավականին ուշ է տեղ հասել։
Սահակ Սահակյանը խցում պատիժը կրում էր երեք այլ դատապարտյալների հետ եւ գտնվում էր ՔԿՀ-ի երկրորդ մասնաշենքում, որտեղ իրենց պատիժը կրում են խիստ ռեժիմի դատապարտյալները։
Դավիթ ԱՐՄԵՆՅԱՆ
