Այսօր՝ հունվարի 21-ին, Ստրասբուրգում կմեկնարկի Եվրոպայի խորհրդի խորհրդարանական վեհաժողովի ձմեռային նստաշրջանը: Հայաստանը նստաշրջանի աշխատանքներին կմասնակցի պատվիրակության նոր կազմով:
Այն կղեկավարի Ազգային ժողովի «Իմ քայլը» խմբակցության պատգամավոր, արտաքին հարաբերությունների մշտական հանձնաժողովի նախագահ Ռուբեն Ռուբինյանը:
Այսօր վեհաժողովը լիագումար նիստի ընթացքում կքննարկի 2018թ. դեկտեմբերի 9-ին Հայաստանում կայացած արտահերթ խորհրդարանական ընտրությունների դիտարկման հարցը:
Այսօր վեհաժողովը կքննարկի նաև Վրաստանում նախագահական ընտրությունների մշտադիտարկման հարցը:
Այսօր ԵԽԽՎ-ն կընտրի Վեհաժողովի նախագահ եւ փոխնախագահներ: Ձմեռային նստաշրջանի ընթացքում ԵԽԽՎ-ում ելույթ կունենա Ֆինլանդիայի նախագահ Սաուլի Նիինիստյոն:
Նստաշրջանի օրակարգում է նաեւ Ադրբեջանում քաղաքական բանտարկյալների հարցը:
Հրատապ քննարկում կկազմակերպվի «Ռուսաստանի ագրեսիան ընդդեմ Ուկրաինայի» թեմայով: Մեկ այլ հրատապ քննարկման թեմա կդառնան Թուրքիայում ընդդիմադիր գործիչների նկատմամբ ճնշումները:
Նստաշրջանի ընթացքում կքննարկի նաև մամուլի ազատության հարցը՝ ապատեղեկատվության և քարոզչության համատեքստում:
Առանձին քննարկում տեղի կունենա «Սերգեյ Մագնիտսկի՝ անպատժելիության դեմ պայքար թիրախային պատժամիջոցների միջոցով» թեմայով:
Տաթև ՀԱՐՈՒԹՅՈՒՆՅԱՆ
