«Ադրբեջանցիները հայերին ջարդում էին, ողջ-ողջ թաղում, նետում հիվանդանոցի պատուհաններից». Գանձակի ինքնապաշտպանության ղեկավար

«Անցել է 30 տարի: Այդ դեպքերի՝ հայերի բռնագաղթի մասին բոլոր լուսանկարներն ու փաստաթղթերն ամփոփել եմ մեկ գրքում, որի մասին շատերը, ցավոք, տեղյակ չեն: Ցավոք, երիտասարդությունը չգիտի հայաթափման պատճառների մասին: Կուզենայի, որ մեր Ազգային ժողովը եւս իմանար, թե ինչ է կատարվել Ադրբեջանի հայաշատ քաղաքներում եւ գյուղերում»,-Aravot.am-ի հետ զրույցում պատմեց 1988թ.-ի Գանձակի (Կիրովաբադ) հայերի ինքնապաշտպանական մարտերը ղեկավարած Գրիշա Օգանեզովը, որը ներկայում հայ փախստականների «Ահազանգ» հ/կ ղեկավարն է: Նա այսօր մասնակցում էր Բաքվի հայերի հունվարյան ջարդերի զոհերի հիշատակին նվիրված ոգեկոչման միջոցառմանը: Հիշեցնենք, որ 1988թ.-ին երկաթե ձողերով զինված ադրբեջանական խմբերը ներխուժել են Գանձակի հայկական թաղամասեր, սպանել ու թալանել: Միայն Գանձակում է, որ հայերին հաջողվել է ինքնապաշտպանության դիմել:

76-ամյա Գրիշա Օգանեզովը համոզմունք հայտնեց, որ ՀՀ նոր Ազգային ժողովը պետք է նշյալ դեպքերը ցեղասպանություն որակի. «Դժվար է վերհիշելը, նորից ապրում ենք այդ դեպքերը: Յոթ անմեղ մարդու սպանեցին միայն նրա համար, որ հայ էին: Հիվանդանոցից նոր վիրահատված հայերին բժիշկները դուրս էին շպրտում…հայերի տներն այրում էին, մարդկանց ջարդում: Հետագայում գտել են ողջ-ողջ թաղված 17 հայերի, որոնց ադրբեջանցիների խմբերը հանել-տարել էին հոգեբուժարանից: Ինքնապաշտպանության շնորհիվ է, որ Գանձակում, ի տարբերություն Բաքվի եւ Սումգայիթի ջարդերի, քիչ թվով զոհեր եղան: Ուզում եմ ասել, որ հույսը միշտ մեր վրա պետք է դնենք»:

Այլ մանրամասները՝ տեսանյութում:

https://www.facebook.com/aravot.am/videos/237799640488504/

Լուիզա ՍՈՒՔԻԱՍՅԱՆ