«Այն հսկայածավալ աշխատանքը, որ սպասվում է խորհրդարանին, կարծում եմ, որ կսպասարկի ժողովրդի սպասելիքները»,- այսօր «Պոստ սկրիպտում» մամուլի ակումբում կարծիք է հայտնել ԲՀԿ խմբակցության պատգամավոր Սերգեյ Բագրատյանը: Օրենսդիրը ձեւավորված է, երկուշաբթի օրվանից խորհրդարանը կսկսի իր լիարժեք աշխատանքները, նա հույս ունի, որ կառավարության ամբողջական ձեւավորումից հետո բարեփոխումների եւ վերանայումների հերթը կհասնի նաեւ իշխանության երրորդ ճյուղին`դատական իշխանությանը:
«Ոլորտի խնդիրները լուծելու համար պետք է մոբիլիզացնել հանրապետության բոլոր կարող ուժերին, որպեսզի նաեւ արդարադատությունը դառնա հիմքը, որի վրա կկառուցվեն պետական բոլոր հարաբերությունները, պետություն-բիզնես- մասնավոր հատված հարաբերությունները»,- ասաց նա`կարեւորելով նաեւ չորրորդ իշխանության դերը եւ ոլորտի կայացումը: Բազմազանության հետ մեկտեղ, պատգամավորն առաջ է քաշում պատասխանատու մամուլի խնդիրը, որը կնպաստի պատասխանատու քաղաքացու եւ պատասխանատու հասարակության ձեւավորմանը: «Դա չի նշանակում գրաքննություն, դա նշանակում է ավելի պատասխանատու եւ ավելի բարձր իրավագիտակցությամբ հարաբերություններ»,- ասաց նա`հավելելով, որ բոլոր զարգացումները կբերեն պետության եւ քաղաքացու շահի սպասարկմանը:
Պատգամավորը խնդիր չի տեսնում, որ իշխող ուժը բացարձակ մեծամասնության է տիրապետում թե օրենսդիր, թե գործադիր իշխանությունում: Ասում է, այն բոլոր պատճառաբանությունները, թե կան խանգարող հանգամանքներ`խոստումները կատարելու համար, այլեւս չկա: Հետեւաբար, իշխող ուժը պետք է աշխատի եւ շատ արագ: ԲՀԿ-ն էլ հետամուտ է լինելու, որ «Իմ քայլի» նախընտրական խոստումները կատարվեն. «Ակնդետ հետեւելու ենք»: Այն հարցերում, որտեղ խոստումները կհամընկնեն`ԲՀԿ-ն կաշխատի իշխանության հետ:
Նելլի ԳՐԻԳՈՐՅԱՆ
