Մոսկվան բացատրություն է սպասում Բաքվից հայկական արմատներով Ռուսաստանի քաղաքացիներին Ադրբեջանի տարածք մուտքն արգելելու յուրաքանչյուր միջադեպի վերաբերյալ: Այս մասին ասվում է Ռուսաստանի ԱԳՆ տարածած մեկնաբանության մեջ:
«Ծանոթացել ենք Ադրբեջանի ԱԳՆ մամուլի ծառայության… արձագանքին: Մատնանշում ենք դիվանագիտական պատշաճության սահմաններն անցնող տոնայնությունը: Ոչ պակաս տարակուսանք է առաջացնում դրա բովանդակությունը, ըստ որի պահանջում են «չծածանել» Ադրբեջան եկող Ռուսաստանի քաղաքացիների նկատմամբ խտրականության թեման որպես իբր փոքր նշանակություն ունեցող հարց երկկողմ հարաբերությունների շարունակական դինամիկ զարգացման ֆոնին»,- ասվում է Ռուսաստանի ԱԳՆ հայտարարության մեջ:
Նման մոտեցումը, ըստ Ռուսաստանի ԱԳՆ-ի անընդունելի է: «Գործի հետ կապ չունեցող ընդհանուր դատողությունների փոխարեն կցանկանայինք լսել առարկայական բացատրություն ռուսների հետ կապված միջադեպերից յուրաքանչյուրի վերաբերյալ»,- ասել է են գերատեսչությունից:
«Ակնկալում ենք դիվանագիտական խողովակներով պաշտոնական բացատրություն՝ կապված ադրբեջանական կողմի ակնարկների հետ առ այն, որ Ռուսաստանի քաղաքացիները պետք է Ադրբեջան իրենց այցերը համաձայնեցնեն Մոսկվայում գտնվող հանրապետության դեսպանատան հետ, ինչը կլիներ Ռուսաստանի Դաշնության և Ադրբեջանի Հանրապետության միջև 1997թ. հուլիսի 3-ին կնքված առանց վիզայի այցելությունների համաձայնագրի խախտում: Կախված ադրբեջանական կողմի բովանդակալից պատասխանից՝ կորոշենք մեր հետագա քայլերը»,- հավելել են գերատեսչությունից:
Ադրբեջանի ԱԳՆ պատասխանը շատ չի ուշացել: Այն Ռուսաստանի ԱԳՆ-ի մեկնաբանությունը որակել է որպես «վերջնագիր»:
«Ադրբեջանը և Ռուսաստանը իրավահավասար ինքնիշխան պետություններ են, Ադրբեջանի հետ վերջնագրի տոնով խոսելն անթույլատրելի է և միանգամայն հակասում է դիվանագիտական էթիկայի նորմերին»,- ասվում է հաղորդագրության մեջ:
Ադրբեջանական կողմի համաձայն «Ռուսաստանի ԱԳՆ մամուլի ծառայության անբացատրելու համառությունն այս հարցում դժվար է հասկանալ»: «Այն հակասում է Ադրբեջանի և Ռուսաստանի միջև ռազմավարական հիմքերին: Միաժամանակ նման մոտեցումը ոչ մի կերպ չի համընկնում Ադրբեջանի և Ռուսաստանի նախագահների կողմից ցուցաբերող կամքին և երկու պետությունների միջև հարաբերությունները զարգացնելու նրանց աշխատանքին»,- ասվում է Ադրբեջանի ԱԳՆ հաղորդագրության մեջ:
Դրանում նաև նշվում, որ «ադրբեջանական կողմը համապատասխան գործողություններ կձեռնարկի՝ համապատասխան Ռուսաստանի ԱԳՆ մամուլի ծառայության հետագա քայլերի»:
Պատրաստեց՝ Վիկտորյա ԱՆԴՐԵԱՍՅԱՆԸ
