«Իհարկե, չի բացառվում, որ դա լինենք նորից մենք, նաեւ չի բացառվում, որ չլինենք մենք»,- սա ԱԺ նախագահ Արարատ Միրզոյանի արձագանքն է ՀՅԴ բյուրոյի ներկայացուցիչ Հրանտ Մարգարյանի քննադատությանը եւ այն հայտարարությանը, որ հինգ տարի հետ լինելու է իշխանափոխություն եւ ՀՅԴ-ն է գալու իշխանության` տուն ուղարկելով այսօրվա իշխանություններին: Արարատ Միրզոյանը համամիտ չէ Հրանտ Մարգարյանի հետ, որ շարժումը չի կարողանում լուծել այն խնդիրները, որոնց համար եկել էր իշխանության:
Արձագանքելով մեկ այլ`Վատիկանում ՀՀ նախկին դեսպան Միքայել Մինասյանի տեսակետին, որ եթե այս իշխանությունը չկարողանա լուծել հասարակության սոցիալական հարցերը, դարձյալ հանրային հուզումներ կլինեն, մինչեւ չգա այնպիսի ուժ, որը կկարողանա լուծել այդ հարցերը, Արարատ Միրզոյանն ասաց. «Ես ոչ թե այդ հայտարարությունն եմ մեկնաբանում, ուղղակի, ուզում եմ, բոլոր նման պնդումների համար ասել, որ տարիներ շարունակ Հայաստանում կար նախեւառաջ արդարության, իրավունքների եւ ազատությունների խնդիր»: Նա չի հերքում սոցիալ-տնտեսական խնդիրների առկայությունը, բայց ասում է՝ դրանք եւս հանգում են իրավունքների խնդիրներին: Հիշեցնում է, որ հենց այս խնդիրն է, որ հասունացրել եւ հնարավոր է դարձրել հեղափոխությունը: Նաեւ հայտարարում է, որ իշխանությունն արդեն իսկ լուծել է իր առջեւ դրված թիվ մեկ խնդիրը, հաղթահարել են. «Ազատ, արդար, արժանապատիվ Հայաստանն այլեւս վաղուց իրականություն է»: Հաջորդ փուլը բարեփոխումների փուլն է, որը սոցիալ-տնտեսական է լինելու: Հիշեցնում է, որ ընդամենը մեկ ամիս է, ինչ այս իշխանությունը ամբողջությամբ ստանձնել է իշխանությունը:
Անդրադառնալով կառավարության կառուցվածքային փոփոխությունների նախագծի`խորհրդարան բերելուն էլ, Արարատ Միրզոյանն ասաց, որ իրենց քաղաքական ուժը թափանցիկ է գործում եւ երբ իրենք ասում են, որ հարցը քննարկումների փուլում է, դա խուսափողական պատասխան չէ: Հարցն իրապես քննարկումների փուլում է. «Վերջնական որոշում այս պահին դեռ չկա: Իմ տպավորությամբ, առաջին նստաշրջանին, մենք, այնուամենայնիվ, կբերենք այդ նախագիծը: Բայց հավանականություն կա նաեւ, որ չբերենք»:
Ինչ վերաբերում է ԱԱԾ-ի եւ ոստիկանության կառուցվածքի եւ ենթակայության հարցին, Արարատ Միրզոյանը կրկնեց իր կարծիքը`քաղաքական սխալ է այս կառույցներին նախարարության կարգավիճակ տալը եւ կրկին քաղաքականացնելը դրանք: Վերջին տարիների հիմնական ձեռքբերումներից մեկը Արարատ Միրզոյանը համարում է հենց այս կառույցների ապաքաղաքականացումը: Նա կարծում է, որ այդ կառույցները պետք է հաշվետու լինեն խորհրդարանին. մեխանիզմները կարող են տարբեր լինել: «Օրինակ, լուծում կարող է լինել, որ ոստիկանությունը վարչապետի ենթակայությունից կարող է բերվել կառավարության վերահսկողության տակ, բայց ԱԱԾ-ն, կարծում եմ, պետք է մնա վարչապետի ուղղակի ենթակայության տակ, որովհետեւ չափազանց սպեցիֆիկ կառույց է դա: Ես կառավարությունում իմ վերջին ամիսների փորձից եմ ասում: Իսկ ոստիկանությունը, օրինակ, կարծում եմ, որ հանգիստ կարող է լինել կառավարության վերահսկողության տակ»,-իր անձնական կարծիքը բարձրաձայնեց Արարատ Միրզոյանը:
ՄԻԵԴ-ի որոշմանն ընդդեմ ՀՀ-ի`գործարար Սամվել Մայրապետյանի գործով, Արարատ Միրզոյանը չանդրադարձավ: Նախ, ասաց, իրավական փաստարկ-հակափաստարկների հարց կա, բայցի այդ, ինքը գործի մանրամասներին չի տիրապետում, բայց վստահ է, որ մյուս կողմն իր հակափաստարկներն ունի: Միայն հիշեց, որ նախկին իշխանությունների օրոք որքան գործեր էին գնում ՄԻԵԴ եւ դա հաստատ ՀՀ-ի շահերից չէր բխում: Նա չի կիսում այն տեսակետը, որ անգամ իշխանափոխությունից հետո, ՀՀ նոր իշխանությունը չի ապահովում մարդու իրավունքների խնդիրը:
Լրագրողներից մեկի հարցին ի պատասխան, Արարատ Միրզոյանն անդրադարձավ նաեւ ԼՀԿ խմբակցության ղեկավար Էդմոն Մարուքյանի տեսակետին, թե Հայաստանում լրջագույն խնդիր կա մարդու իրավունքների հետ կապված: Նա հիշեցնում է`մարդու իրավունքները Հայաստանում վաղուց եւ ավանդաբար խախտվել են: Այժմ էլ, ասում է, որ իհարկե բոլոր խնդիրները միանշանակ լուծված չեն, բայց միայն հեղափոխության ակտով այդ խնդիրների մեծ մասը արդեն լուծված են: Նա չի կիսում Էդմոն Մարուքյանի տեսակետը, որ Հայաստանում մարդու իրավունքների հետ կապված վիճակը լավ չէ:
Անդրադառնալով պետական կառավարման համակարգում կրճատումներին եւ դժգոհություններին, Արարատ Միրզոյանն ասաց, որ խնդիր դրված չէ կրճատումների, խնդիրը բարեփոխումն է եւ այդ համատեքստում կարող են լինել կառույցներ, որոնք կօպտիմալացվեն, կարող են նորերը ստեղծվել եւ այլն:
Նա համամիտ չէ, որ քաղաքացիների մեծ մասը էյֆորիկ տրամադրություններ է տածում իշխանության հանդեպ եւ առաջնորդվում է դրանով: Ասում է, որ ինքը շատ լավ կարծիք ունի մեր քաղաքացիների գիտակցված եւ ողջամիտ կեցվածքի մասին: Հարցին`որքա՞ն ձայն կստանա «Իմ քայլը» հինգ տարի անց, Արարատ Միրզոյանը պատասխանեց. «Ես ոչինչ չեմ կարող ասել հինգ տարի հետո մեր ստանալիք քվեների մասին»:
Նելլի ԳՐԻԳՈՐՅԱՆ
