Այսօր ԱԺ-ում տարածաշրջանային եւ եվրասիական ինտեգրման հարցերի հանձնաժողովի նախագահի պաշտոնում առաջադրված Միքայել Մելքումյանի թեկնածության հարցի քննարկման ժամանակ «Լուսավոր Հայաստան» խմբակցության ղեկավար Էդմոն Մարուքյանը ՌԴ-ում Հայաստանի վարորդական իրավունքով աշխատող մարդկանց խնդիրը հիշեցրեց.
«Այսօր տեսա, որ լայվով ահազանգում էր մեր քաղաքացին, որ այսօր պաշտոնապես արգելվել է մեր վարորդական իրավունքով վարել: Մենք հայ-ռուսական միջխորհրդարանական կազմով այն ժամանակ, երբ գնացել էինք ՌԴ, Պետդումայում բարձրաձայնել ենք խնդիրը, բայց հարցը չի լուծվել, այսօր, փաստորեն, արգելվել է: Հազարավոր մարդկանց իրավունքներ ոտնահարվում են, սա աբսուրդ է ԵԱՏՄ-ի մեջ»:
Նա ասաց, որ երբ Նիկոլ Փաշինյանը պաշտոնական այցով գնում է ՌԴ, ինքը պարբերաբար Փաշինյանին հիշեցնում է վարորդական իրավունքի հարցի մասին, խնդիրը բարձրացվում է, բայց լուծում չի ստանում:
Մելքումյանը պատասխանեց, որ համամիտ է հարցադրման հետ, պետք է միջոցներ ձեռնարկել:
Հռիփսիմե ՋԵԲԵՋՅԱՆ
