Հայաստանի և Վրաստանի վարչապետների ոչ պաշտոնական հանդիպումը բազմաթիվ հարցեր է առաջացրեց փորձագետների մոտ, գրում է «Էխո Կավկազա»-ն:
Կասկածները, որ Նիկոլ Փաշինյանի և Մամուկա Բախտաձեի միջև հանդիպումը ակնհայտորեն նախատեսված էր, ամրապնդում են հունվարի 15-ի երեկոյան վարչապետների մամուլի ծառայությունների կողմից տարածված լուսանկարները:
Դրանցից մեկում Փաշինյանը և Բախտաձեն նստած են փոքրիկ սեղանի շուրջ, գրեթե ասկետական ինտերիերով փոքրիկ նեղ սենյակում: Եվ այդտեղ, ըստ Վրաստանի կառավարության մամուլի ծառայության, խոսում էին հետևյալի մասին.
«Մամուկա Բախտաձեն անձամբ շնորհավորել է Նիկոլ Փաշինյանին Հայաստանի Հանրապետության վարչապետի պաշտոնում հաստատվելու կապակցությամբ: Կառավարությունների ղեկավարները խոսել են երկու երկրների բարիդրացիական հարաբերությունների մասին և հույս են հայտնել շարունակել բեղմնավոր համագործակցությունը»:
Նույնպիսի կարճ հաղորդագրությամբ հանդիպումը ներկայացված էր նաև հայկական կողմից, ինչն ավելի շատ հարցերի տեղիք է տալիս: Ի՞նչը դրդեց Հայաստանի վարչապետին ընտրվելուց հենց երկու օր հետո ժամանել Վրաստան, երբ անգամ դեռ կառավարությունը Հայաստանում ձևավորված չէ: Բացի այդ, նման այցը 2018թ. մայիսին վարչապետ Նիկոլ Փաշինյանի Թբիլիսի կատարած այցի կատարյալ հակապատկերն է:
Քաղաքագետ Զաալ Անջափարիձեն ենթադրում է, որ կառավարությունների ղեկավարների զրույցը վերաբերել է տնտեսական հարցերին:
«Անցյալ տարի Վրաստանի և Հայաստանի միջև մի քանի անհամաձայնություն եղավ: Մասնավորապես՝ կապված ցորենի փոխադրման հետ: Նաև ակնկալվում է նոր տրանսպորտային միջանցքների բացում՝ համաձայն Վրաստանի և Ռուսաստանի միջև Ժնևում ստորագրված պայմանագրի… Եվ դա Հայաստանի համար շատ կարևոր է բեռների շրջանառության ավելացման տեսանկյունից»:
Փորձագետի կարծիքով՝ խոսքը կարող էր գնալ նաև այն մասին, որ Ռուսաստանը պատրաստվում է բարձրացնել գազի գինը Հայաստանի համար, ինչպես նաև «Վերին Լարս» անցակետում առաջ եկող դժվարությունների մասին:
Պատրաստեց՝ Վիկտորյա ԱՆԴՐԵԱՍՅԱՆԸ
