«Իմ քայլը» խմբակցության պատգամավոր Հայկ Կոնջորյանի ելույթն ԱԺ-ում քննադատությունների տեղիք է տվել ու զարմանք հարուցել: Կոնջորյանը ԱԺ արտաքին հարաբերությունների հանձնաժողովի նախագահի ընտրության հարցը քննարկելիս իր ելույթում ասաց, որ Հայաստանն ու Ադրբեջանը նույնացնում են՝ երկու ծույլիկ աշակերտների պես ու եթե մեկն առաջընթաց էլ ունենում է՝ երկուսին նույն աչքով են նայում:
Նա հայտարարեց. «Եթե դիտարկենք մեր աշխարհաքաղաքական դիրքավորումը՝ մենք շրջապատված ենք ավտորիտար Թուրքիայով, ավտորիտար բնույթի Իրանով, ավտորիտար Ադրբեջանով եւ միայն մեր անմիջական հարեւաններից Վրաստանն է, որ ժողովրդավարական ճանապարհով է գնում: Եվ այս շուրջ 160 միլիոնանոց ավտորիտար երկրներով շրջապատված Հայաստանը, եթե ժողովրդավարության առաջանցիկ զարգացումը դարձնում է իր հաղթաթուղթը, կարողանում է նաեւ միջազգային հանրության կողմից ընկալվել որպես տարածաշրջանի առաջատար ժողովրդավարական երկիր, որը ևս անպայման ունենալու է իր դրսևորումները դիվանագիտության մեջ: Օրինակ, նայեք Իսրայելը»:
Ավելի ուշ Կոնջորյանը, նկատելով սոցցանցերում բարձրացված աղմուկը՝ լրագրողների հետ զրույցում հայտարարեց, որ բանավոր խոսքում վրիպել է, էլ չի կրկնվի: Նա վստահեցրեց, որ իր խոսքը խմբակցության տեսակետի հետ որեւէ կապ չունի, դա իր անձնական դիտարկումն ու անձնական վրիպումն էր:
Հռիփսիմե ՋԵԲԵՋՅԱՆ
