ՊԵԿ-ը շոու-բիզնեսի ներկայացուցիչներին հորդորել էր գործել հարկային դաշտում, այսինքն՝ հայտարարագրել եկամուտները: Այս առնչությամբ շոու-բիզնեսի ներկայացուցիչները դժգոհություն էին հայտնել:
«Մենք ասում ենք՝ հայտարարագրեք ձեր եկամուտներն այնքան, որքան ստանում եք: Եթե մարդիկ մտածում են՝ «դուք չեք կարող դա վերահսկել», լավ, չենք կարող, բայց դուք ինքներդ ձեզ չե՞ք կարող վերահսկել: Այսինքն, դուք մտածում եք, որ անպայման մի բան այն չե՞ք անելու: Հայտարարագրեք այնքան, որքան ստացել եք, եթե ուզում եք խաբել, խաբեք: Մենք էլ մեր վարչարարական գործիքները կիրառելով` փորձելու ենք ճշտել, մեր տեղեկատվական աղբյուրների միջոցով փորձելու ենք ճշտել՝ արդյոք տվյալ անձը ճիշտ հայտարարագիր է ներկայացրել, թե՝ ոչ»,-ասել էր Անանյանը:
Aravot.am-ն այսօր ասուլիսի ժամանակ Անանյանից հետաքրքրվեց՝ արդյոք իրենց հայտարարությունից հետո շոու-բիզնեսի որեւէ ներկայացուցիչ հետեւել է իրենց հորդորին եւ հայտարարագրել եկամուտները:
«Ոչ, որեւէ մեկը չի հայտնվել»,-ասաց Անանյանը:
Եվ ի՞նչ պետք է անեք, ասում էիք՝ ձեր գործիքներով պիտի խնդիրը լուծեք, մեր այս հարցին ի պատասխան՝ Անանյանն ասաց. «Այն, ինչ պիտի անենք, դուք շատ կարճ ժամանակահատվածում կտեղեկացվեք: Համենայնդեպս, չենք անելու օրենսդրությունից չբխող որեւէ գործողություն»:
Այսինքն՝ մինչ օրս որեւէ երգիչ հայտարարագիր չի՞ ներկայացրել կամ ասենք ձայնասկավառակի վաճառքից հարկեր վճարել, մեր այս հարցին ի պատասխան էլ, Անանյանն ասաց.«Այս պահին ես որեւէ տեղեկատվություն չունեմ»:
Մանրամասն՝ տեսանյութում
Նելլի ԲԱԲԱՅԱՆ
