Կրթության, գիտության, մշակույթի, երիտասարդության եւ սպորտի հարցերի խորհրդարանական հանձնաժողովի նախագահի հարցն է քննարկվում ԱԺ-ում ու ԲՀԿ պատգամավոր Գեւորգ Պետրոսյանը, որը նաեւ ԵՊՀ իրավագիտության ֆակուլտետի դասախոս է, ներկայացրեց ներքին խոհանոցից մի խնդիր. «Տեսնում ես նույն ուսանողը 8 անգամ գալիս է քննության, մոտավորապես հիշում ես ծանրամարտի մրցումներ՝ 6 անգամ մոտենալ ծանրաձողին: Եվ գիտե՞ք պատճառաբանությունն ինչն է՝ ասում են՝ բա որ դուրս թողնենք, ուսման վարձ տվող է սա, ուսման վարձից մենք հրաժարվե՞նք»:
Պետրոսյանն առաջարկեց. «Ընդունելության ցուցակները բաց պահեք, պետք չի փակել ու արխիվացնել: Եթե տվյալ ուսանողը, որը ժամանակից շուտ մատնում է գիտության հետ լրիվ վերջնահաշվարկ կատարած լինելու իր կեցվածքը, նրան կփոխարինի առաջին կուրսում այն ուսանողը, որը նույնպես պատրաստ է ուսման վարձ վճարել ու որը գալու է ու իր ներկայությամբ պարզապես զարդարի տվյալ բուհը, այսինքն՝ սովորի եւ բուհ գալը ոչ թե օգտագործի՝ նորաձեւության վերջին նվաճումները ցուցադրելու համար, այլ իսկապես սովորելու, գիտելիք ստանալու ու վերարտադրելու համար»:
Նա նաեւ ասաց, որ այնպիսի իրավակարգավորում պետք է լինի, որ դասախոսը չնստի գիշերները գիրք գրի, որ հետո մտածի՝ այդ գիրքը ոնց փաթաթի ուսանողի ուսերին, ուսանողն էլ գնա այստեղ-այնտեղ գանգատվի. «Բուհը պետք է այնպիսի համակարգ մտածի, որ ուսման վարձերից մի ֆոնդ տրամադրի դասախոսին, ով ամեն տարի, ելնելով պրակտիկայի, գիտության նորություններից, օրենսդրության նորություններից, թարմացնի նյութը եւ այն էլեկտրոնային եղանակով հասցնի ուսանողին»:
Պատգամավորն անդրադառնալով դպրոցների տնօրենների ընտրության հարցին, ասաց. «Մտածեք, որ ԱԺ-ն ներկայացուցիչ ունենա ցանկացած հանձնաժողովում, որը պետք է անցկացնի դպրոցի տնօրենի ընտրություն: Տնօրեններ կան, որ վաղուց զբաղված են արդեն ուղեղի սովաբուժությամբ ու վերջին տասնամյակում ժամանակ չեն գտել ընթերցանությամբ զբաղվել, բայց իրենց ճակատին գրված է, որ հենց իրենք պետք է լինեն դպրոցի տնօրեն, որովհետեւ այդ դպրոցի տնօրեն եղել է իր նախապապը, հետո պապը, հետո հայրը, հետո ինքը ու իրավահաջորդության կարգով այդպես շարունակ»:
Հռիփսիմե ՋԵԲԵՋՅԱՆ
