ՊՊԾ գնդի գրավման գործով այսօր հարցաքննվեց գործից անջատված մասով մեղադրյալներից 1991թ. ծնված Կարեն Հակոբյանը՝ մեղադրյալներից Մարտիրոս Հակոբյանի՝ ազատամարտիկ «Դեդ»-ի որդին: Նա, ըստ գործի նյութերի, մասնակցել է ՊՊԾ գնդի գրավմանը, սակայն լքել է գնդի տարածքը: Կարեն Հակոբյանը դատավոր Մեսրոպ Մակյանին տեղեկացրեց, որ հրաժարվում է մինչ այդ տված ցուցմունքներից եւ չի պատրաստվում այսօր ցուցմունք տալ:
Ըստ այդմ, հրապարակվեց նրա նախաքննական ցուցմունքը, որում նա պատմել է նաեւ գնդի գրավմանը նախորդած իրադարձությունների մասին: Կարեն Հակոբյանը նշել է, որ հայրը ԼՂՀ Քաշաթաղի շրջանում երկար տարիներ եղել է համայնքներից մեկի ղեկավարը, իսկ ապրիլյան ռազմական իրադարձություններից հետո մարտական ընկերների հետ մեկնել առաջնագիծ:
Կարեն Հակոբյանն էլ է ցանկացել գնալ առաջնագիծ, եւ այդ նպատակով դիմել է «Երկրապահ կամավորականների միությանը»: Որոշ ժամանակ անց Մարտիրոս Հակոբյանը վերադարձել է սահմանից եւ տեղեկանալով որդու քայլի մասին՝ նախատել. «Ի՞նչ գործ ունես «Երկրապահի»-ի հետ: Ինքնագլուխ ոչինչ չանես, տղերքով ջոկատ ենք կազմելու եւ գնալու պատերազմ»:
Կարեն Հակոբյանը նախաքննական ցուցմունքում ասել է՝ Մարտիրոս Հակոբյանն իրեն հայտնել է, որ ջոկատի հրամանատարը Ժիրայր Սեֆիլյանն է լինելու, եւ նրան են միացել շատ հայրենասերներ ու ազատամարտիկներ, այդ թվում՝ Պավլիկ Մանուկյանը:
Որոշ ժամանակ անց Մարտիրոս Հակոբյանը որդուն տեղեկացրել է, որ Ժիրայր Սեֆիլյանը կալանավորված է, բայց դա իրենց չի կանգնեցնի, եւ Վարուժան Ավետիսյանն է հեղաշրջման համակարգողի գործառույթը կատարելու:
Ինչ վերաբերում է ՊՊԾ գնդում եղած ժամանակ տեղի ունեցածին, Կարեն Հակոբյանը ուշագրավ դրվագ է պատմել իր նախաքննական ցուցմունքում. «Բերեցին Օսիպյանին, նրա հետ Պավլիկ Մանուկյանն էր բանակցում: Օսիպյանն ասաց՝ «արա՜, լավ, գոնե պագոններս չպոկեիք, այսքան տարի համակարգում աշխատել եմ»:
Իսկ երբ ոստիկանական զրահամեքենան է գրոհել գունդը գրավածների վրա, ըստ Կարեն Հակոբյանի՝ Պավլիկ Մանուկյանն այդ ժամանակ Երեւանի փոխոստիկանապետ Վալերիյ Օսիպյանին ասել է. «Տեսա՞ր, Օսիպյան, քեզ էլ չեն խնայի»:
Հիշեցնենք, որ քրեական գործի նյութերում այլ վկայություններ էլ կան այն մասին, որ զինված խմբի անդամներից Աշոտ Պետրոսյանն է Վալերիյ Օսիպյանի ուսադիրները պոկել:
Կարեն Հակոբյանը նախաքննական ցուցմունքում նաեւ նշել է, որ Մարտիրոս Հակոբյանն իրեն հրահանգել է՝ եթե ոմանք ընթացքում կփոշմանեն եւ չեն ցանկանա մասնակցել հեղաշրջմանը, պետք է պահվեն առանձին վայրում, որպեսզի իրավապահներին չհայտնեն խմբի մտադրությունների մասին:
Ապա Կարեն Հակոբյանը հայտարարեց՝ նշյալ ցուցմունքները գրել է ճնշման ներքո, ուստի ամեն ինչ չէ, որ համապատասխանում է իրականությանը:
Մանրամասն՝ քիչ ուշ:
https://www.facebook.com/aravot.am/videos/600966210357932/
Լուիզա ՍՈՒՔԻԱՍՅԱՆ
