Երեւանի ընդհանուր իրավասության դատարանը դատավոր Արթուր Մկրտչյանի նախագահությամբ այսօր քննեց ՀՀ երկրորդ նախագահ Ռոբերտ Քոչարյանի կալանքը երկու ամսով երկարաձգելու քննիչի միջնորդությունը։ Մոտ չորս ժամ տեւած քննությունից հետո դատարանն աշխատանքները կշարունակի վաղը 11-ին։ Մարտի մեկի քրեական գործի շրջանակներում ՀՀ սահմանադրական կարգը տապալելու համար մեղադրվող ՀՀ երկրորդ նախագահ Ռոբերտ Քոչարյանի շահերի պաշտպաններից Հայկ Ալումյանը քիչ առաջ լրագրողների հետ զրույցում նշեց, որ պաշտպանական կողմն առարկություններ է ներկայացրել քննիչի միջնորդության դեմ եւ ներկայացրել մարտի մեկից առաջ տեղի ունեցած հանրահավաքներից որոշ տեսանյութեր։
Դրանցից մեկում, ըստ Ալումյանի, ցուցարարների մեջ կանգնած մի քաղաքացիական հագուստով անձ «գլխավերեւով» կրակում է ոստիկանների ուղղությամբ։ Պաշտպանի փոխանցմամբ` այսօր տեղեկացել են, որ այդ տեսանյութը մինչ այդ էլ եղել է քննիչի մոտ։ Ավելին, վերջինս այն արդեն ուղարկել է փորձաքննության։ Քոչարյանի պաշտպանները կշարունակեն առարկություններ ներկայացնել վաղը։
Լուիզա ՍՈւՔԻԱՍՅԱՆ
