ԱԺ հանձնաժողովների նախագահների պաշտոնում առաջադրված թեկնածուների անունները հայտնի են: Պատգամավորները հնարավորություն ունեցան հարցեր ուղղելու թեկնածուներին ու նրանց մոտեցումը ճշտելու ոլորտային հարցերի հետ կապված:
Պետաիրավական հարցերի հանձնաժողովի նախագահի պաշտոնում առաջադրված Վլադիմիր Վարդանյանին Էդմոն Մարուքյանն ասաց՝ ԱԺ կանոնակարգն այնպես է գրված, որ եթե հանձնաժողովի նախագահը չլինի բարեխիղճ, շատ լուրջ պրոբլեմներ են լինում, որ հետո է հայտնաբերվում, օրինակ, կանոնակարգը թույլ է տալիս, որ կոնկրետ նախագծի քննարկման ժամանակ բանավոր առաջարկություն մտցնեն քվեարկությամբ ու բերել մեծ օրակարգ՝ մարդիկ չիմանան: Մարուքյանը հարցրեց, թե ապագայում ի՞նչ մոտեցում է ունենալու այս հանձնաժողովի նախագահը՝ Վարդանյանը պատասխանեց, որ պետք է սովորեն կոլեգիալ որոշումներ ընդունելու մշակույթը: Նա ասաց, որ հանձնաժողովն է ԱԺ մարմինը, ոչ թե հանձնաժողովի նախագահը ու այստեղ ծածուկ ինչ-որ բաների, «պառլամենտական ծովահենության տեղ չի»: Մարուքյանն ասաց, որ կարեւոր է, որ այսպես հրապարակային խոստումներ տրվեն. «Ինչպես ամերիկյան ֆիլմերում է ասվում՝ այն, ինչ դուք կասեք՝ կօգտագործվի ձեր դեմ հետագայում դատարանում, հիմա կարեւոր է, որ հրապարակային խոստումներ տրվեն»:
Առողջապահության հարցերի հանձնաժողովի նախագահի պաշտոնում առաջադրված Նարեկ Զեյնալյանը կարեւորեց դեղերի շուկայի խնդիրը՝ դեղերի ապօրինի շրջանառության, կասկածելի գնագոյացման, դեղերի ներկրման հարցերը. «Հստակ պետք է օրենսդրորեն կարգավորվի այս ոլորտը»: Նա ասաց, որ ընտանեկան բժշկության համակարգը պետք է համընդհանուր ներդրվի: Զեյնալյանը խոսեց ժողովրդագրական խնդիրների մասին, փարոսի մասին, ասաց, որ կոռուպցիոն ռիսկերը սոցիալական նպաստի համակարգում բավականին մեծ են: Սոցիալական աշխատողի ու բնակչի անմիջական շփումը պետք է տարանջատեն:
«Իմ քայլը» խմբակցությունից Հայկ Կոնջորյանն ասաց, որ մեր երկրում վերջին տարիներին ոչ թե առողջապահություն է եղել, այլ՝ հիվանդապահություն, ով փող է ունեցել, առողջ է եղել, կամ գոնե շանս է ունեցել առողջ լինելու, իսկ ով փող չի ունեցել՝ զրկվել է նաեւ այդ շանսից:
«Լուսավոր Հայաստանից» Մանե Թանդիլյանն էլ Զեյնալյանին հարցրեց՝ դուք արդյոք ճշտել եք Արարատ Միրզոյանից օդում կախված լուրերի ակունքներն ու ճշտությունը երեխաների օրգանների վաճառքի հետ կապված ու դիմե՞լ եք իրավապահ մարմիններին: Զեյնալյանը պատասխանեց, որ առաջին անգամ է լսում դրա մասին, տեղեկություն չունի:
Արարատ Միրզոյանն իր կողմից պարզաբանեց, որ խոսքը միջազգային մաֆիայի մասին է այդ ոլորտում ու Հայաստանի՝ այդ ռիսկերից խուսափելու քայլերի:
Հռիփսիմե ՋԵԲԵՋՅԱՆ
