Հայաստանի նոր Ազգային ժողովի ձևավորմանը և Նիկոլ Փաշինյանի՝ վարչապետ նշանակվելուն արձագանքել են միջազգային լրատվամիջոցները:
Մասնավորապես, թուրքական Daily Sabah թերթը, գրում է, որ նախագահ Արմեն Սարգսյանը ցույցերի նախկին առաջնորդ Նիկոլ Փաշինյանին նշանակել է վարչապետի պաշտոնում:
Թերթը մեջբերում է նախագահի ելույթն Ազգային ժողովում, որի համաձայն դեկտեմբերին տեղի ունեցած ընտրությունները «այս խորհրդարանին օժտել են բարձր լեգիտիմությամբ»: Թերթը նաև գրում է, որ խորհրդարան են անցել միայն այն կուսակցությունները, որոնք սատարել են Փաշինյանին «թավշյա հեղափոխության» ժամանակ:
Xinhua գործակալությունը, հղում կատարելով Հայաստանի նախագահ Արմեն Սարգսյանի գրասենյակին, գրում է, որ Նիկոլ Փաշինյանը նախագահի կողմից վերանշանակվել է վարչապետի պաշտոնում:
Թերթը գրում է, որ նոր կառավարությունը կձևավորվի վարչապետի նշանակումից հետո 15 օրվա ընթացքում, ինչպես նաև հիշեցնում, որ խորհրդարանական ընտրություններում Փաշինյանի գլխավորած իմ քայլը դաշինքը ստացել է ձայների ավելի քան 70 տոկոսը:
«Հայաստանում Փաշինյանը նշանակվում է վարչապետ «թավշյա հեղափոխությունից» հետո». Այսպես է վերնագրել իր հոդվածը France 24-ը:
«Հայաստանում սպասվող հիմնական քաղաքական փոփոխությունն արդեն տեղի է ունեցել. Իշխանությունը վերադարձվել է ժողովրդին և հաստատվել է ժողովրդավարություն»,- մեջբերում է France 24-ը Փաշինյանի խոսքերը:
Պատրաստեց՝ Վիկտորյա ԱՆԴՐԵԱՍՅԱՆԸ
