Այսօր Երեւանի ավագանին նիստ էր հրավիրել՝ քննարկելու 2019 թվականի տեղական տուրքերի գծով արտոնություններ սահմանելու մասին հարցը: Արտոնությունը սահմանվել է 115 միլիոն դրամ տարեկան շրջանառությունը չգերազանցող տնտեսվարողների համար:
Հարցը ավագանու անդամներին ներկայացրեց Երեւանի քաղաքապետարանի Եկամուտների հաշվառման եւ գանձման վարչության պետ Արմեն Հարությունյանը: Ասաց, որ նախագծի համաձայն, ընթացիկ տարում Երեւանում հեղուկ վառելիքի, սեղմված բնական կամ հեղուկացված նավթային գազերի վաճառքի թույլտվության համար տեղական տուրքի դրույքաչափը կնվազի 58.33%-ի չափով, առեւտրի օբյեկտներին ժամը 24:00-ից հետո աշխատելու թույլտվության համար՝ 72.98%-ի չափով, ինչպես նաեւ հանրային uննդի եւ զվարճանքի օբյեկտներին ժամը 24:00-ից հետո աշխատելու թույլտվության համար տեղական տուրքի դրույքաչափը կնվազի 70%-ի չափով:
Բացի այդ, նախագծով սահմանվել են նաեւ արտոնություններ այն տնտեսվարողների համար, որոնք ՀՀ արդարադատության նախարարության իրավաբանական անձանց պետական ռեգիստրի գործակալությունում հաշվառվել կամ գրանցվել են 2019թ.-ի հունվարի 1-ից: Նախագիծը ավագանին միաձայն հաստատեց:
Ավագանու անդամ ԲՀԿ խմբակցության ներկայացուցիչ Մարկոս Հարությունյանը ելույթի իրավունք խնդրելով, մտահոգություն հայտնեց, որ դեռեւս կան մարդիկ, որոնք շարունակում են լինել արտոնյալներ եւ ավտոմեքենաներ են վարում՝ առանց գույքահարկ վճարելու: Նա ասաց, որ ցուցակը այդ ավտոմեքենաների կփոխանցի քաղաքապետ Հայկ Մարությանին:
Քաղաքապետ Մարությանն ի պատասխան ասաց, որ մի այդպիսի ցուցակ էլ իրենք ունեն եւ այդ ուղղությամբ լուրջ աշխատանքներ են տանում:
Լուսինե ԲՈՒԴԱՂՅԱՆ
