«Լույս» խմբակցության ավագանու անդամ Դավիթ Խաժակյանը (լուսանկարում) հայտարարել է, որ դատի է տալու Երեւանի քաղաքապետարանին, եթե չհրապարակի այն անձանց ցուցակը, որոնք տարեվերջին պարգեւավճարներ են ստացել:
Այսօր Երեւանի քաղաքապետարանում տեղի ունեցած ավագանու նիստից հետո, Երեւանի քաղաքապետ Հայկ Մարությանից լրագրողները հետաքրքրվեցին՝ ինչո՞ւ չեն հրապարակում այդ մարդկանց անունները, պաշտոնները՝ հատկապես, որ դրանք այնքան էլ անձնական տվյալներ չեն պարունակում՝ ինչպես որ պատճառաբանում է Երեւանի քաղաքապետարանը: Այն դիտարկմանը, թե ի վերջո այդ գումարները բյուջեից են վճարվել աշխատակիցներին եւ այդպիսի ցուցակ հրապարակվել է նախկին իշխանությունների կողմից, քաղաքապետ Հայկ Մարությանը պատասխանեց, որ այդ ցուցակը հրապարակելը կլինի օրենքի խախտում եւ, եթե նախկինում հրապարակվել է, դեռ չի նշանակում, որ օրենքի խախտմամբ չի արվել. «Մենք դիմել ենք Արդարադատության նախարարություն՝ նրանց կարծիքը լսելու եւ նոր միայն խնդիր չունենք հրապարակելու: Բայց մենք չենք ուզում խախտել օրենքը եւ չենք ուզում մեզ դատի տան այդ մարդիկ»:
Հայկ Մարությանն ասաց, որ թաքցնելու բան չունեն, որ թափանցիկ են աշխատում, բայց չեն կարող հրապարակել տվյալներ, որոնք անձնական են: Քաղաքապետը չէր հիշում՝ ամենաշատը որքան գումար պարգեւավճար են ստացել:
Դավիթ Խաժակյանի խոսքով, քաղաքապետի կարգադրության չհրապարակումը վնասում է թափանցիկությանը։
Հիշեցնենք, որ անցյալ տարվա վերջին քաղաքապետի կարգադրությամբ քաղաքապետարանի շուրջ 2.000 աշխատակիցներ պարգեւավճար եւ խրախուսանք են ստացել:
Լուսինե ԲՈՒԴԱՂՅԱՆ
