Քիչ առաջ Երեւանի ընդհանուր իրավասության դատարանի դատավոր Արթուր Մկրտչյանը, որը քննում է ՀՀ երկրորդ նախագահ Ռոբերտ Քոչարյանի գործը, մերժեց իր դեմ պաշտպանական կողմից ներկայացված ինքնաբացարկի միջնորդությունը։ Դա նշանակում է, որ գործը շարունակելու է քննել դատավոր Արթուր Մկրտչյանը։ 14:30-ից հետո դատարանը պետք է քննի Ռոբերտ Քոչարյանին գրավի դիմաց ազատ արձակելու միջնորդությունը, նաեւ ՀՔԾ-ի ներկայացրած` նրա կալանքը երկու ամսով երկարաձգելու միջնորդությունը։
Քոչարյանի շահերի պաշտպան Հայկ Ալումյանը լրագրողների հետ զրույցում շեշտեց, որ դատարանը պետք է նախապատվություն տա առաջին միջնորդության քննարկմանը։ Իսկ դատավորի ինքնաբացարկի միջնորդության մերժումը պաշտպանները հիմնավոր չեն համարում եւ գտնում են, որ դատավորի ընտրությունը կամայական է արվել։
Հայկ Ալումյանի փոխանցմամբ` միջնորդության մերժման մեջ որպես հիմնավորում է նշվել այն հանգամանքը, որ Երեւանի ընդհանուր իրավասության դատարանի նախագահն իրավունք ունի ընտրել, թե որ դատավորն է գործը քննելու, մինչդեռ Քոչարյանի պաշտպանները պնդում են, որ դատավորի ընտրությունը պետք է կատարվեր էլեկտրոնային վիճակահանության միջոցով։
Հիշեցնենք, որ ՀՀ երկրորդ նախագահ Ռոբերտ Քոչարյանը Մարտի մեկի քրեական գործի շրջանակներում մեղադրվում է ՀՀ սահմանադրական կարգը տապալելու համար։ Նա կալանավորված է։
Լուիզա ՍՈւՔԻԱՍՅԱՆ
