Այսօր ԱԺ փոխնախագահի պաշտոնում փակ գաղտնի քվեարկությամբ ընտրվեց Ալեն Սիմոնյանը՝ 109 կողմ ձայներով: Քվեարկությանը մասնակցել էր 130 պատգամավոր, 1 քվեաթերթիկ անվավեր էր, դեմ էր քվեարկել 20 պատգամավոր:
Լենա Նազարյանին կողմ էր քվեարկել 124 պատգամավոր, 3 քվեաթերթիկ անվավեր էր, 3-ը դեմ:
Իսկ որպես ընդդիմադիր փոխնախագահ ընտրվեց Վահե Էնֆիաջյանը: Նրա օգտին քվեարկել էր 108 պատգամավոր, 3 քվեաթերթիկ համարվել էր անվավեր: Մյուս թեկնածուի՝ Մանե Թանդիլյանի օգտին քվեարկել էր 19 պատգամավոր:
Հիշեցնենք, որ «Լուսավոր Հայաստան» խմբակցությունն ունի 18 մանդատ, հետեւաբար Մանե Թանդիլյանին կողմ քվեարկած 19 ձայնը հուշում է, որ կա՛մ ԲՀԿ-ից, կա՛մ «Իմ քայլը» դաշինքից առնվազն մեկը չի անսացել խմբակցության որոշմանը:
Ալեն Սիմոնյանը շնորհակալություն հայտնեց իրեն ընտրողներին ու այն 20 պատգամավորներին, որոնք դեմ են քվեարկել, ասաց, որ շատ համակրում է ԼՀԿ-ին, վստահ է, որ լավ է աշխատելու նաեւ ԲՀԿ-ի կողմից առաջադրված Վահե Էնֆիաջյանի հետ: Էնֆիաջյանն էլ վստահեցրեց, որ ինքը ժողովրդի ձայնը բերելու է խորհրդարան՚:
RA National Assembly of the Seventh Convocation conducts the sitting on January 15, 2019
Վերջում Էնֆիաջյանը գեղեցիկ ժեստ արեց Մանե Թանդիլյանի հանդեպ՝ նրան նվիրելով սպիտակ վարդերի մի ծաղկեփունջ ու սեղմելով նաեւ Էդմոն Մարուքյանի ձեռքը: Նաիրա Զոհրաբյանը իր տեղից կատակեց. «Վարդերի հեղափոխություն»: ԱԺ նախագահ Արարատ Միրզոյանն էլ արձագանքեց՝ «Տեղակալների վարդերի հեղափոխություն»:
Ուշագրավ էր, որ «վարդերի հեղափոխությունից» շփոթված՝ Էնֆիաջյանը ԱԺ նիստերի դահլիճում նորից զբաղեցրեց իր հին տեղը՝ մոռանալով, որ ԱԺ նախագահությունում տեղ ունի: Արարատ Միրզոյանի խոսքով՝ «Ես չհասկացա՝ քվեարկության արդյունքներից պարոն Էնֆիաջյանը գո՞հ է, թե՞ գոհ չէ»:
Հռիփսիմե ՋԵԲԵՋՅԱՆ
