ԱԺ նախագահ Արարատ Միրզոյանն արտահերթ ելույթ ունեցավ ԱԺ-ում՝ ընդդիմադիր փոխխոսնակների հարցի քննարկման ժամանակ: Նա ասաց, որ այլ իրավիճակում եթե ընտրություն կատարեր երկու թեկնածուների՝ Վահե Էնֆիաջյանի ու Մանե Թանդիլյանի միջեւ, կընտրեր կին թեկնածուին. «Եթե ստիպված լինեի ընտրել երկու ուժերի միջեւ՝ ԲՀԿ-ԼՀԿ, ես չէի ընտրի ոչ մեկին, որովհետեւ իմ քաղաքական ուժի ընտրությունը ես վաղուց արել եմ, ես կընտրեի «Իմ քայլը» դաշինքին: Բայց ես այս ընտրություններին մոտենում եմ բոլորովին այլ տրամաբանությամբ, այստեղ նույնիսկ «Իմ քայլը» դաշինքի համար ընտրության հարց չի, այլ քաղաքական դաշտում եւ խորհրդարանում դիրքավորվելու հարց է ու այդ դիրքավորումը պիտի հիմնված լինի հստակ սկզբունքի վրա: Մի դեպքում կա սկզբունք, մյուս դեպքում չկա սկզբունք: «Իմ քայլը» հայտարարում է, որ ժողովրդի կողմից հաստատված համամասնության արդյունքը իրեն իրավունք չի վերապահում փոխել»:
Արարատ Միրզոյանը նաեւ ասաց, որ նախնական կոնսուլտացիաներին ժամանակ հաճույքով համաձայնել են կարեւորագույն, երբեւէ ընդդիմության կողմից չղեկավարվող հանձնաժողովներից մեկը զիջել «Լուսավոր Հայաստան» խմբակցությանը՝ հաշվի առնելով հնարավոր թեկնածուների անցած ճանապարհը եւ մասնագիտական հմտությունները:
Հռիփսիմե ՋԵԲԵՋՅԱՆ
