Ծառուկյանի աշխարհաքաղաքական, տնտեսական վերլուծությունը՝ Իրանից, Չինաստանից սկսած՝ մինչեւ Արցախի հարց

Այսօր խորհրդարանում ԱԺ ընդդիմադիր փոխնախագահի ընտրության հարցի շուրջ քննարկման ժամանակ ԲՀԿ խմբակցության ղեկավար Գագիկ Ծառուկյանը, ԱԺ ամբիոնին մոտեցավ՝ խմբակցության տեսակետը ներկայացնելու, բայց ներկայացրեց նաեւ Հայաստանի տնտեսական կառուցվածքի իր վերլուծությունը:

Նա խոսեց ՓՄՁ-ների կարեւորության, բանկային համակարգի մասին. «Մեր բանկային համակարգերում պետք է փոփոխություն լինի, մեր բանկիրները պետք է կարողանան համագործակցել եվրոպական, համաշխարհային բանկերի հետ, այնտեղ տարբեր վարկեր են տրվում երիտասարդ ընտանիքների, ՓՄՁ-ների համար՝ 0 տոկոս, 0,25, 0,75, տոկոս, եթե այդպիսի վարկեր կարողանան բերել, մեր ժողովրդին կարող են տրամադրել 2-3 տոկոսով ու մեր ժողովուրդն էլ կկարողանա լիարժեք ոտքի կանգնել, ոչ թե լինի 8, 10, 15 տոկոս: Վարկերի հետ կապված որոշումներ կան, մարդը եթե 5 տարով վարկ է վերցնում, առաջին տարում փակում է վարկի տոկոսային չափը, մնացած տարիների ընթացքում՝ մայր գումարը: Մարդը եթե ուզում է վարկը մեկ տարի հետո գումարը վճարի, դուրս գա, ասում են՝ պիտի 7 տարվանը վճարես: Այ քո ցավը տանեմ, մարդը եթե կարողանում է մի տարվա ընթացքում վճարի, փակել, ինչի՞ համար 7 տարվա տոկոսը տա: Պիտի քննարկենք, էդ հարցերը կարգավորենք»:

Հետո Ծառուկյանն անցավ արտաքին քաղաքականությանը՝ ասելով, որ մեր կապերը պետք է զարգացնենք Ռուսաստանի հետ ոչ թե խոսքով, այլ՝ գործնական, որ ավելի մեծ ներդրումներ, զարգացումներ լինեն, դրանք ավելի շոշափելի լինեն մեր առօրյայում. «Մենք ունենք 3 մլն բնակչություն, հայրենակիցներ, որոնք այնտեղ աշխատում են, արարում են, զգում են ՌԴ-ն՝ որպես իրենց երկրորդ հայրենիք ու ամսական 120-150 մլն դոլար գումար են ուղարկում իրենց ընտանիքներին, իրենց ծնողներին: Դա պետք է մենք հաշվի առնենք, ավելի լայնացնենք, հզորացնենք ապրանքաշրջանառությունը, ներդրումները: Ռուսաստանը միշտ էլ եղել է ռազմաքաղաքական, տնտեսական մեր գործընկերը, դա պիտի ավելի ամրապնդենք, զարգացնենք, դա միայն ու միայն օգուտ կլինի մեր երկրին: Մենք ասենք ԵԱՏՄ անդամ ենք, մյուս երկրների հետ էլ համագործակցենք, կապը, շփումը, որ դա միայն օգուտ կբերի: Մենք ունենք ԵՄ-ի հետ տնտեսական հուշագիր ստորագրած, միակ երկիրն ենք ու պետք է կարողանանք կամուրջ հանդիսանալ ԵԱՏՄ-ի ու ԵՄ-ի հետ, ավելի օգուտ կլինի տնտեսության զարգացման համար՝ ԵԱՏՄ-ԵՄ-ԱՄՆ կամուրջ է լինելու, մենք կկարողանանք լիարժեք արդյունքների հասնել»:

Ծառուկյանը նաեւ անդրադարձավ Չինաստանին. «Մետաքսի ճանապարհի հարցը 5 տարի է՝ քննարկվում է, պատկերացրեք, եթե այդ ճանապարհի խաչմերուկը Հայաստանն է հանդիսանում, այդ կապող օղակը, տնտեսության զարգացման համար ամենաճիշտ ճանապարհն է, մենք պետք է դրան ուշադրություն դարձնենք, դա միանգամից մեր տնտեսական կարգավիճակը կփոխի»:

Նա հորդորեց հայ-չինական համատեղ ձեռնարկություններ բացել. «Գիտեք, իրենք օգտվում են տեխնոլոգիական, գիտական մեթոդներով, իրենց ապրանքը ամենաէժանն է աշխարհով մեկ, մենք մեր շուկան ունենք, կարողանանք ԵԱՏՄ, ԵՄ զարգացնենք»:

Խոսելով Իրանի մասին՝ Ծառուկյանն ասաց, որ Իրանն իրեն բարեկամի նման է պահել, ոչ մի խնդիր չի առաջացրել ու պետք է կարողանանք այդ հարաբերությունները ջերմորեն պահել-պահպանել:

Այսքանից հետո Գագիկ Ծառուկյանն անդրադարձավ ղարաբաղյան հարցին. «Արցախի խնդիրը մեր ժողովուրդը լուծել է, միայն մնում է միջազգային ճանաչում, ինչքան ճանաչումը շուտ լինի, այնքան մեր խնդիրները կկարգավորվեն: Բայց այդ միջազգային ճանաչումը կախված է, որ մեր պետությունը ավելի հզոր լինի, հզոր պետությունների հետ են հաշվի նստում: Մենք պետք է կարողանանք դա կազմակերպել: Դրա համար անհրաժեշտ է, որ սփյուռքահայերի հետ, որ դրսում ունենք 12 մլն սփյուռքահայ, պետք է այդ կապը ավելի ամրապնդվի: Մեր հայրենակիցները Հայաստան գալուց իրենց ամուր պետք է զգան: Պայմանները, հնարավորությունները, ջերմությունը…նրանք մեր հայրենասեր հայրենակիցներն են, դա գործով են ապացուցել»:

Ծառուկյանն ասաց, որ Հայաստանի ու Արցախի անվտանգության երաշխավորը մեր բանակն է, իր կյանքով ու գործով ապացուցել է. «Այսօր մեծ աշխատանքներ պետք է կատարվի, պատերազմող երկիր ենք, ռազմարդյունաբերությունը պետք է հզորացվի 21-րդ դարին համապատասխան»:

Ըստ Ծառուկյանի, 18 տարեկան զինվորն առաջին գծում պետք է չկանգնի: Առաջին գծում պետք է կանգնեն պայմանագրային փորձառու զինծառայողները: Կարող ենք այդ որոշումն ընդունել, խնդիրները լուծել. «Չլուծվող խնդիր չկա»:

Ի դեպ, Գագիկ Ծառուկյանին հատկացված ժամանակը վաղուց սպառվել էր, բայց նա դեռ վերլուծում էր ու ամբիոնի մոտ խոսում՝ նախորդ տարիների «տեղը հանելով»: Արարատ Միրզոյանը, հասկանալով հարցի նրբությունը, փորձում էր չընդհատել:

Հռիփսիմե ՋԵԲԵՋՅԱՆ