Խորհրդարանի նիստում ԱԺ ընդդիմադիր փոխնախագահի ընտրության հարցի շուրջ քննարկումները շարունակվում են:
Առաջին անգամ ԱԺ ամբիոնին մոտեցավ 2003-ից պատգամավոր ընտրված Գագիկ Ծառուկյանը, այս անգամ՝ որպես ԲՀԿ խմբակցության ղեկավար. «Ուզում եմ մի երկու բառ ասել պարոն Մարուքյանին՝ մեր կլասիկ պատգամավորին: Բոլորդ էլ տեսել եք, որ ես ոչ մի խնդիր չունեմ «Լուսավոր Հայաստանի» հետ, ինքն է հարցը տվել, ես պատասխանել եմ: Պատասխանից հետո ինքը մոտեցել է, ես իրա ձեռը ջերմ սեղմել եմ, ամսի 10-ին էլ իրենց շնորհավորել եմ: Ասենք թե իրենք ասում են՝ Ծառուկյանը պետք է քաղաքականությունից դուրս գա, Ծառուկյանը որ չլիներ, մենք կլինեինք երկրորդը…Դե կարելի էր «Իմ քայլին» էլ ասել՝ ինքն էլ չմասնակցեր, կլինեիք առաջինը, ձեր ցավը տանեմ: Մինչեւ մեզ չվիրավորեն, մեզ չկպնեն, մենք ոչ մի բան ոչ մեկին չենք ասի, չի կարող այդպիսի դեպք լինել: Ասում են, ներկայացնում են, հետո էլ ասում են՝ մենք ոչ մի բան չենք ասել: Որեւիցե մեկը հենց փորձեց մեզ վիրավորել, դրա պատասխանը դոկումենտալ՝ փաստաթղթերով, տեսաժապավենով ներկայացնելու եմ»:
Ծառուկյանը հայտարարեց, որ ԱԺ-ում իրենք թշնամիներ չեն, ամեն մեկը իր թեկնածուին թող ներկայացնի, ընտրեն:
Նա վստահեցրեց, որ իրենց նպատակն է ժողովրդի կյանքի բարեկեցությունը, ներդրումների ավելացումը, տնտեսական հեղափոխությունը:
Հռիփսիմե ՋԵԲԵՋՅԱՆ
