ՀՀ 2-րդ նախագահ Ռոբերտ Քոչարյանի գրավով ազատ արձակելու գործը քննող դատավոր Արթուր Մկրտչյանն այսօր դատական նիստում ինքնաբացարկ չհայտնեց։ Քոչարյանի պաշտպաններն այս դատավորին ինքնաբացարկի միջնորդություն էին ներկայացրել, հիմնավորելով՝ պաշտպաններից Արամ Օրբելյանի եւ Մկրտչյանի ընտանիքների միջեւ կա որոշակի ջերմ հարաբերություններ:
Դատարանը մերժեց այս միջնորդությունը:
Լրագրողների հետ զրույցում Քոչարյանի պաշտպան Հայկ Ալումյանը հայտնեց, որ դատարանը պատճառաբանեց, թե՝ Արամ Օրբելյանի հետ դատավոր Արթուր Մկրտչյանի կապերն այնքան մտերիմ չեն, որպեսզի դա ազդի դատավորի անաչառության վրա:
Այսօր Երեւանի ընդհանուր իրավասության դատարանի Կենտրոնի նստավայրում պետք է քննվեր 2 միջնորդություն՝ Քոչարյանի պաշտպանների միջնորդությունը՝ Քոչարյանի նկատմամբ խափանման միջոց ընտրված կալանավորումն այլընտրանքային խափանման միջոց գրավով փոխարինելու վերաբերյալ, մյուսը՝ ՀՔԾ-ի միջնորդությունը՝ Քոչարյանի կալանքը եւս երկու ամսով երկարացնելու վերաբերյալ։
Այս միջնորդությունները դատարանը կքննի վաղը:
Նելլի ԲԱԲԱՅԱՆ
