«Իմ քայլը» խմբակցությունն ԱԺ փոխնախագահի պաշտոնում առաջադրել է Լենա Նազարյանի թեկնածությունը:
Լենա Նազարյանն իր ելույթում ասաց, որ պարբերաբար մտահոգություն է լսում, որ հանկարծ չընդհատվի հանրություն-ԱԺ կապը: Նա ասաց, որ ինչպես հեղափոխության օրերին են համերաշխաբար գործել, հիմա էլ գործելու են միասնաբար. «Մեր մասին հաճախ ասում են, որ մենք փորձ չունենք: Մինչեւ հեղափոխությունը մենք հիմնականում զրկված ենք եղել պետական մարմնում կառավարման փորձ կուտակելու հնարավորությունից: Սակայն ունենք մեր անցած ուղիով ձեռք բերած փորձը՝ անանցանելի թվացող խոչընդոտների հաղթահարման փորձ, սեփական ուժերին ապավինելու ու փոխօգնությամբ գործելու փորձ, չհանձնվելու փորձ, մեր գաղափարներին ու օրակարգերին հավատարիմ մնալու փորձ: Մենք պարտավոր ենք պայմաններ ստեղծել քաղաքացիների ու քաղաքացիական խմբերի համար՝ սեփական խնդիրները լուծելու ելքեր գտնելու համար՝ մտքում պահելով մեր անցած ճանապարհը…Մենք ունենք փորձ ու հավատարիմ ենք մնալու մեր փորձին»:
Լենա Նազարյանն անդրադարձավ նաեւ սոցցանցերում հնչող դժգոհություններին՝ խորհրդարանի կազմի մեծաթիվ լինելու վերաբերյալ, ասաց, որ այս ԱԺ-ն նախորդի համեմատ 27-ով ավելի պատգամավոր ունի, դա ժառանգել են նախորդներից, բայց ԱԺ կազմի մեծացումը պետք է ենթադրի աշխատանքի ու արդյունքների բազմապատկում. «Պետք է պատգամավորների թվի աճը վերածենք առավելության»:
«Իմ քայլը» խմբակցության անդամ Գոռ Գեւորգյանն ասաց, որ Լենա Նազարյանը արագ խնդիրներն ընկալելու ու լուծումներ առաջարկելու հմտություն ունի, որը չափազանց կարեւոր է օրենսդիր հարթակում. «Համոզված եմ, որ թեկնածությունը, որն առաջադրվել է ի դեմս Լենա Նազարյանի, միանշանակ կնպաստի ՀՀ բարեկեցության ապահովմանը, որն այլեւս մեզանում իրականություն է: Բաստիլն ընկել է ու եկել է պետականաշինության կառուցման յուրաքանչյուրիս վրա դրված պարտավորության ժամը»:
Իսկ պատգամավոր Տաթեւիկ Հայրապետյանն ասաց, որ ինքն անձամբ մոտիվացվել է Լենա Նազարյանի շնորհիվ՝ որպես քաղաքականության մեջ կին գործիչ. «Տիկին Նազարյան, դուք իմ մոտիվացիայի աղբյուրներից մեկն եք եղել ու վստահ եմ,որ առաջիկայում ԱԺ փոխխոսնակի պաշտոնում կկարողանաք մոտիվացնել բազմաթիվ երիտասարդ կանանց, որոնք կփորձեն իրենց ուժերը քաղաքականության ասպարեզում»:
Հռիփսիմե ՋԵԲԵՋՅԱՆ
