«Սատարում եմ ուսուցչիս՝ Միխայիլ Աղաջանովի ընտանիքին: Այստեղ եմ, որպեսզի հարգեմ մանկությանս ընկերոջ՝ Իոսիֆ Աղաջանովի հիշատակը: Եկել եմ ընտանիքով, որպեսզի ընդգծեմ՝ նման չարագործությունը՝ երեխայի առեւանգումը եւ դաժան սպանությունը, աններելի է»,-կառավարության դիմաց ընդդեմ Մհեր Ենոքյանի հնարավոր ներմանն ուղղված բողոքի ցույցի ժամանակ այսօր լրագրողների հետ զրույցում ասաց Մ. Հերացու անվան Երեւանի պետական բժշկական համալսարանի ռեկտոր, Առողջապահության նախկին նախարար Արմեն Մուրադյանը:
Հիշեցնենք՝ օրերս լուր տարածվեց, որ Արդարադատության նախարարության ներման հանձնաժողովը դրական եզրակացություն է տվել 1996թ. ուսանող Իոսիֆ Աղաջանովի սպանության համար ցմահ ազատազրկված Մհեր Ենոքյանի խնդրագրին (այն դեռ պետք է ստորագրի նախագահը՝ վարչապետի կողմից ներկայացվելուց հետո):
Ցույցի մասնակիցների թվում էր նաեւ սպանվածի հայրը՝ Միխայիլ Աղաջանովը:
Արմեն Մուրադյանը նշեց, որ որպես բժիշկ եւ ընտանիքի հարազատ՝ միացել է բժիշկների ստորագրահավաքին՝ Մհեր Ենոքյանին ներում չշնորհելու պահանջով: Ինչ վերաբերում է խոսակցություններին, որ Միխայիլ Աղաջանովի՝ ԵՊԲՀ-ում դասավանդելու պատճառով դասախոսների միջեւ գուցե տարաձայնություններ առաջանան Մհեր Ենոքյանի հարցի շուրջ, Արմեն Մուրադյանը համոզմունք հայտնեց. «Բացառում եմ: Այստեղ գտնվող դասախոսները բժիշկներ են կերտել, նրանք իրենց ուսուցչի կողքին են, եւ կարելի է հասկանալ նրանց»:
Արմեն Մուրադյանը նաեւ հայտարարեց, որ Իոսիֆ Աղաջանովի ողբերգության շուրջ հնչող շահարկումներն ու վիրավորանքներն անընդունելի են:
Մհեր Ենոքյանի գործի վերաբերյալ նրա կնոջ՝ փաստաբան Զարուհի Մեջլումյանի կարծիքը՝ այստեղ:
https://www.facebook.com/aravot.am/videos/4632149800231053/
https://www.facebook.com/aravot.am/videos/235926567328701/
Լուիզա ՍՈՒՔԻԱՍՅԱՆ
Խնդրում եմ ուղարկեք կայքը Էլեկտրոնային քվեարկության համար ։ Լռությունը չարիք է ծնում ։ Ի՜նչ լավ ժամանակներ եկան չարագործների համար։
Հարգելի Արմեն Մուրադյան , Ձեր նեցուկ լինելը միայն Աղաջանովների ընտանիքին չէ, այլև հասարակությանը։ Հազիվ գտնվեց ազնիվ ու ճիշտ մեկը , որը ի վիճակի է առանց իր աթոռը կորցնելու վախից սատարի Ճշմարտությանը։ Շնորհակալություն բոլոր սատարողներին ։