Կառավարության դիմաց այսօր մի խումբ քաղաքացիների բողոքի ցույց էր՝ ընդդեմ ցմահ ազատազրկված Մհեր Ենոքյանի հնարավոր ներման:
Հիշեցնենք՝ օրերս լուր տարածվեց, որ Արդարադատության նախարարության ներման հանձնաժողովը դրական եզրակացություն է տվել նրա խնդրագրին (այն դեռ պետք է ստորագրի նախագահը՝ վարչապետի կողմից ներկայացվելուց հետո):
«Երկու հոգի մեկին խաբելով՝ սպանել են…ի՞նչը վերանայվի, ամեն ինչ պարզ է: Վերանայումը ձգձգելու միտում ունի»,-լրագրողների հետ զրույցում ասաց 1996թ. սպանված Իոսիֆ Աղաջանովի հայրը՝ Մ. Հերացու անվան պետական բժշկական համալսարանի կենսաքիմիայի ամբիոնի վարիչ Միխայիլ Աղաջանովը՝ արձագանքելով հարցին, թե ինչպե՞ս կվերաբերվի, եթե, օրինակ, գործի քննությունը վերաբացվի:
Անվանի բժիշկը պատմեց՝ երբ Արամ Հարությունյանը 15 տարի պատիժը կրելուց հետո դուրս եկավ բանտից, ոմանք նրան նամակներ են գրել՝ հորդորով ընդունել, որ ինքն է հիմնական մեղավորը, քանի որ արդեն կրել է իր պատիժը, ուստի Մհեր Ենոքյանին կարդարացնեն. «Այդ պատճառով Արամ Հարությունյանը թողեց-գնաց երկրից: Ասում են՝ ԱՄՆ-ում է: Ես ոչ նրան էի ճանաչում, ոչ էլ…ես միայն ուզում եմ, որ մեղավորները պատժվեն: 20 տարի մեզ տարան-բերեցին, հիմա էլ վերաբացումից եք խոսո՞ւմ, հերիք է, էլի»:
Ինչ վերաբերում է Մհեր Ենոքյանին, Միխայիլ Աղաջանովը նշեց. «Նայում եմ դեմքին՝ երջանիկ, ժպտացող, կերած-խմած…նայում եմ ու վատանում՝ մի անգամ չտեսա, որ զղջար, ներողություն խնդրեր: Մեղքը չընդունած եւ չզղջացած մարդը, ըստ օրենքի, չի կարող պետության կողմից ներման արժանանալ»:
Պարոն Աղաջանովը մեկնաբանեց նաեւ մեղադրանքները, թե իրենց ընտանիքը «սատարել» է Արամ Հարությունյանին ու թիրախավորել միայն Մհեր Ենոքյանին. «Առաջին իսկ օրից երկուսի համար էլ դատարանում մահապատիժ եմ պահանջել»:
Աղաջանովները եւ նրանց համախոհները կառավարության ներկայացուցչին նամակ հանձնեցին՝ պահանջով, որպեսզի Մհեր Ենոքյանին ներում չշնորհիվի, իսկ վարչապետ Նիկոլ Փաշինյանն էլ հանդիպի ու լսի իրենց:
Գործի վերաբերյալ Մհեր Ենոքյանի կնոջ՝ փաստաբան Զարուհի Մեժլումյանի կարծիքը՝ այստեղ:
https://www.facebook.com/aravot.am/videos/4632149800231053/
Լուիզա ՍՈՒՔԻԱՍՅԱՆ
Ո՜նց եմ հասկանում ծնողի ցավը․ “Միխայիլ Աղաջանովը նշեց. «Նայում եմ դեմքին՝ երջանիկ, ժպտացող, կերած-խմած…նայում եմ ու վատանում՝ մի անգամ չտեսա, որ զղջար, ներողություն խնդրեր: Մեղքը չընդունած եւ չզղջացած մարդը, ըստ օրենքի, չի կարող պետության կողմից ներման արժանանալ»:
Եվ այդ կերած խմածը, այդ խորամանկը, այդ գարշելին որը հենց այս հեղափոխությունն էր երազում , պիտի օգտվի Հեղափոխության պտուղներից՞։ Երբե՛ք ու երբե՛ք։ Նրան զնդան է պետք և ո՛չ թե դրսի աշխարհի վայելում ։
© 1998 – 2018 Առավոտ – Լուրեր Հայաստանից
Ազատություն Մհերին