Այսօր 7-րդ գումարման ԱԺ անդրանիկ նիստում որոշվեց հաշվիչ հանձնաժողովի կազմը: Ըստ այդմ, հաշվիչ հանձնաժողովի 7 անդամներից 5-ը «Իմ քայլը» խմբակցությունից են, մեկական անդամ էլ՝ ընդդիմադիր խմբակցություններից՝ ԲՀԿ եւ «Լուսավոր Հայաստան»:
Այս պահին ԱԺ նախագահի ընտրության հարցն է քննարկվում, ինչպես հայտնի է, «Իմ քայլը» խմբակցությունն այդ պաշտոնում առաջարկել է Արարատ Միրզոյանի թեկնածությունը:
Խմբակցության ղեկավար Լիլիթ Մակունցը ներկայացրեց Արարատ Միրզոյանի կենսագրությունը:
Հետո ելույթ ունեցավ Արարատ Միրզոյանը: Նա իր ելույթն սկսեց սեպագիր արձանագրություններից ու էպոսից հատված մեջբերելով. «Հանուն մեր երկրի հզորության եւ ի սարսափ թշնամաց… Դառնամ, զօղորմին տամ, Սանասարին, Բաղդասարին.
Դառնամ, զօղորմի՛ն տամ
Ջոջ Մհերին.
Դառնամ, զօղորմի՛ն տամ
թառլան Դավթին,
Դառնամ, զօղորմի՛ն տամ
Փոքր Մհերին,
Դառնամ, զօղորմի՛ն տամ
Սասնա տան մեծին ու պստիկին…»:
Արարատ Միրզոյանը խոսեց թավշյա հեղափոխության, արժեքների մասին, ասաց, որ հեղափոխությւոնից հետո ՀՀ առաջին փոխվարչապետի պաշտոնում աշխատելիս իր առաջնային առաքելությունն է համարել հնարավորն ու անհնարինն անել,որ պետական կառավարման մեքենան սահուն անցում ունենա ու ավելի արդյունավետ աշխատի. «Այժմ ես պատրաստ եմ լծվել նոր մարտահրավերների հաղթահարմանը»:
Հռիփսիմե ՋԵԲԵՋՅԱՆ
