Այսօր Հայաստանի հանրապետության յոթերորդ գումարման խորհրդարանն իր առաջին նիստը գումարեց: Նորընտիր պատգամավորներից շատերը այսօր շարունակում էին ծանոթանալ խորհրդարանի շենքին, շատերը դեռ աշխատասենյակներ չունեն, ոմանք էլ ունեն, բայց դրանց տեղը չեն գտնում կամ դրանք դեռ ազատված չեն: Շատերն էլ շարունակում էին մոլորվել խորհրդարանի անծանոթ եւ լաբիրինթոսի նմանվող շենքում:
Օրինակ, ԱԺ ՀՀԿ խմբակցության սենյակներն այժմ կզբաղեցնեն ներկայումս իշխող ուժ «Իմ քայլը» դաշինքի ղեկավարները: ՀՀԿ խմբակցության պատգամավոր Վահրամ Բաղդասարյանը վաղուց է հավաքել իր իրերը: Նրա նախկին աշխատասենյակը եւ խմբակցության քարտուղարի աշխատասենյակն այսպիսի տեսք ունեն:
Նախկին ՀՀԿ-ական պատգամավորներ Արման Սահակյանի, Սամվել Ալեքսանյանի, Տաճատ Վարդապետյանի աշխատասենյակների ցուցանակները դեռ հանված չեն:
Եթե մյուսների աշխատասենյակները գրեթե կամ ամբողջովին դատարկ են, ապա Սամվել Ալեքսանյանի սենյակի փափուկ կահույքն անդամ տեղում է:
Դեռ հանված չեն նաեւ ՀՅԴ խմբակցության եւ ՀՅԴ-ական պատգամավորների աշխատասենյակների ցուցանակները: Դրանք էլ են զբաղեցնելու «Իմ քայլի» պատգամավորները: ՀՅԴ խմբակցության սենյակները դեռ «ճամպրուկային» վիճակում են:
ԱԺ նախագահի աշխատասենյակի ցուցանակը նույնպես հանված չէ: Սակայն, հավաքե՞լ է իրերը Արա Բաբլոյանը, թե՞ ոչ, չկարողացանք ճշտել: Այդ հարկաբաժնի սենյակներում նկարահանումներ չեն թույլատրվում:
Փոխարենը ԱԺ նախկին առաջին փոխնախագահ ՀՀԿ-ական Էդուարդ Շարմազանովի աշխատասենյակը դեռ կապիտալ վերանորոգման մեջ է: Այդ աշխատասենյակը զբաղեցնելու է Ալեն Սիմոնյանը:
Իսկ Արփինե Հովհաննիսյանի աշխատասենյակը զբաղեցնելու է Լենա Նազարյանը: Նրա օգնականները թույլ չտվեցին նկարել աշխատասենյակը: Ասացին`միայն տիկին Նազարյանի համաձայնությունը ստանալուց հետո:
Ընդդիմադիր նախկին փոխնախագահ ԲՀԿ-ական Միքայել Մելքումյանի աշխատասենյակը կզբաղեցնի ԲՀԿ-ական փոխնախագահի թեկնածու Վահե Էնֆիաջյանը: ԲՀԿ-ական պատգամավորներից շատերի աշխատասենյակները նոր մասնաշենքից կտեղափոխվեն հին մասնաշենք, որտեղ ԲՀԿ խմբակցության սենյակն է: ԲՀԿ-ականները կզբաղեցնեն գեներալ-պատգամավորներ Մանվել Գրիգորյանի, Սեյրան Սարոյանի եւ դրանց հարեւանությամբ գտնվող սենյակները:
«Լուսավոր Հայաստանի» հավանաբար կտրվեն ԱԺ հին մասնաշենքի առաջին հարկի սենյակները, որոնք նախկինում զբաղեցնում էին «Ելք»-ի պատգամավորները:
Նելլի ԳՐԻԳՈՐՅԱՆ
