Հանրային հեռուստաընկերության լուրերի ծրագրում գրաքննություն չկա: Aravot.am-ի հետ զրույցում վստահեցրեց հեռուստաընկերության լրատվական ծառայության տնօրեն Պետրոս Ղազարյանը, որն այս պաշտոնին է նշանակվել անցած տարվա դեկտեմբեր ամսին:
Լուրերի թողարկումում, ինչպես նաեւ կադրային քաղաքականությունում, ինչպես ասաց Ղազարյանը, շատ մեծ փոփոխություններ են կատարվել:
«Երկուշաբթի օրվանից մենք եթեր ենք մտնելու շատ ավելի մեծ ծավալով. 2 ժամը մեկ կլինեն լուրեր, ժամը 13:00-ից սկսած առավոտյան թողարկում կլինի, հյուրեր են լինելու հրատապ թեմաներով: 60 րոպե տեւողությամբ կլինի ժամը 21:00-ի լուրերի թողարկումը, որտեղ կլինի նաեւ իմ հարցազրույցը: Շաբաթ օրը կունենանք երեկոյան գլխավոր թողարկումը, որովհետեւ մեր լուրերի վերջին ժամն է լինելու՝ 1 ժամանոց գլխավոր թողարկումն է: Լուրերում կփորձենք հնարավորինս ուղիղ եթերի ռեժիմով արագ, օպերատիվ լրատվություն տալ: Կլինեն մեկնաբանություններ, կապեր աշխարհի տարբեր կետերից: Շատ մեծ են փոփոխությունները, ամսի 14-ից եթեր կմտնենք այդ ռեժիմով»:
Ղազարյանի փոխանցմամբ՝ լուրերի մեկնաբանական գրեթե ողջ կազմը եւ լրագրողների գրեթե կեսը փոփոխվել են:
Արդյոք, այսպես ասած՝ հանրայինի լուրերի հնաբնակ լրագրողները նոր լրագրողներով են փոխարինվելու, մեր այս հարցին ի պատասխան Ղազարյանն ասաց՝ «Հանրային հեռուստաընկերության լուրերը երկրում խոսքի ազատության չափորոշիչները դնող ինստիտուտ է նաեւ: Եթե հանրայինի լուրերը ազատ են իքս չափով, ապա այդ երկրում իքս չափով է ազատ խոսքի ազատությունը, եւ մնացած բոլոր լրատվակաները իրենց ազատությունում մինիմում այդքանը կարող են անել: Այս պարագայում մեր խնդիրն է փոխել այդ լուրերի տրամաբանությունը, ինչպես որ մինչեւ հիմա այս 20 տարիների ընթացքում եղել է հանրայինում, որպեսզի այն չլինի իշխանական: Ես առաջին օրվանից ասել եմ՝ մենք՝ լուրերը, չակերտավոր ասած՝ հակահեղափոխական ենք, հիմա չպետք է լինենք հեղափոխական: Հիմա մենք պետք է լինենք լրագրողական: Մենք հակահեղափոխականներից ոչ թե պետք է դառնանք հեղափոխական, այլ պետք է դառնանք լրագրող: Եվ լուրերը լինելու են այդ տրամաբանության մեջ՝ հավասարակշռված, հավասարահեռ եւ օպերատիվ: Այն, ինչը, որ լուր է, այն ինչը հասարակությանը հետաքրքիր է իր կարծիքը ձեւավորելու համար, դա նրանք առաջինը կտեսնեն հանրայինով: Կադրային բոլոր փոփոխությունները միտված են այս տրամաբանության սպասարկմանը»:
Այդ քաղաքականությունն ու տրամաբանությունը բխում է ղեկավարությունից, ինչպիսի պահանջ դնի ղեկավարությունը, այդպես էլ կաշխատի լրագրողը, արդյոք պարտադի՞ր էր լրագրողական կազմի մեծ փոփոխություն, մեր այս հարցին պարոն Ղազարյանն այսպես պատասխանեց. «Ես ոչ մեկին չեմ ուզում որեւէ բան պարտադրել: Ես կարծում եմ՝ առանց որոշակի թիմի փոփոխության, ոլորտի փոփոխության, ոչ մի նոր զարգացում հնարավոր չէ: Եվ հենց դրա համար ասացի՝ փոխվել է գրեթե կեսը, ինչը ենթադրում է որ այն մի կեսը մնացել է»:
Թե որ լրագրողներն այլեւս չեն աշխատի հանրայինի լուրերի ծառայությունում, Ղազարյանը անուններ չտվեց, ասաց՝ «Չեմ ուզում անձնավորված նայել երեւույթին: Բայց մի բան կասեմ՝ այն, ինչ տեսել ենք, չեմ ուզում գնահատական տալ, դա կփոխենք եւ կտանք օպերատիվ, հավաստի լրատվություն: Հասարակությունը դրա համար վճարում է եւ իրավունք ունի եթերում տեսնել դա: Եվ եթե վերջին 20 օրերին լուրերը դիտել եք՝ իշխանությանը հաճո որեւէ բան լուրերում չկա եւ չի լինելու»:
Արդյոք լուրերի թողարկումում հանրությունը տեսնելու է Պետրոս Ղազարյանի «ճաշակով» մեկնաբանների եւ լրագրողների, թե՝ հանրային սեր վայելող դեմքեր, այս հարցին ի պատասխան էլ նա ասաց՝ «Ես ասացի չափանիշները՝ օպերատիվ ու օբյեկտիվ: Մարդ կա չի սիրում այդպիսի լուրեր, կարող է մարդ կա՝ իշխանամետ է եւ սիրում է, որ լինեն ընդդիմությանը հարվածող լուրեր, կարող է մարդ կա՝ չի սիրում գործող իշխանությանը եւ ցանկանում է միայն քննադատական լուրեր տեսնել: Մենք չենք շարժվելու ո՛չ այս, ո՛չ այն տրամաբանությամբ: Մենք հավասարահեռ ենք լինելու, չքաղաքականացված լուրեր»:
Ղազարյանն ասաց՝ նրանք, ովքեր չեն աշխատի այլեւս, բոլորին շնորհակալություն է հայտնելու, բացատրել է իրավիճակը եւ ինչ խնդիր են լուծելու. «Երբ մարդը գործից դուրս է գալիս, դա սոցիալական խնդիր է, եւ ես դա շատ ծանր եմ տանում: Մի բան պիտի հասկանանք ՝ կամ գնում ենք առաջ, կամ գնում ենք նույն ձեւով»:
Հանրային եք բերում այն լրագրողներին, որոնց հետ ժամանակին Կենտրոն ՀԸ-ում աշխատել եք, եւ դա, ըստ որոշ կարծիքների, ձեր ամբիցիան է. այս դիտարկմանն էլ Ղազարյանը պատասխանեց՝ «Ես ամբիցիա ունեմ, եւ դա նախկին «Հայլուրի» տրամաբանությունը փոխելն է: Սուտ է, Կենտրոն ՀԸ-ից որեւէ մեկ գործող լրագրող չի եկել, բայց որ լավը լիներ՝ մենք կհրավիրեինք: Դրանում ոչ մի վատ բան չեմ տեսնում, բայց չեմ բերել»:
Պետրոս Ղազարյանը վստահեցրեց՝ «Մենք քաղաքական տաբուներ չունենք: Ե՛վ ընդդիմությունն է լինելու եթերում, ե՛ւ իշխանությունը: Մեր խնդիրը հարթակ ստեղծելն է, որպեսզի հանրությունը ճիշտ կարծիք կազմի»:
Փետրվար ամսվա սկզբից հանրայինում սկսվում է մեծ եթերաշրջանը, եւ ինչպես պրն Ղազարյանը նշեց՝ քաղաքական «թոք-շոու»-ներ են լինելու, քննարկումների ֆորմատ կլինի, որտեղ կհնչեն փորձագիտական, քաղաքագիտական եւ քաղաքական կարծիքներ:
«Մենք նաեւ շատ լուրջ ակտիվացնելու ենք յութուբի մեր ալիքը, ֆեյսբուքյան էջը, ծրագրում ենք «Տելեգրամ» հավելվածն օգտագործել: Այս բոլոր հարթակները կօգտագործենք օպերատիվ լուրերի համար»:
Մեդիա դաշտում ուղիղ եթերները բավականին ավելացել են, արդյոք հանրայինի լուրերում ուղիղ եթերներ հեռարձակելը մրցակցության պահանջ է: Այս հարցին ի պատասխան էլ Պետրոս Ղազարյանն ասաց. «Ցանկացած պարագայում ցանկալի է լուրերը ուղիղ մատուցել, քան սպասել մի քանի ժամ հետո տալ: Ինչո՞ւ չեն եղել նախկինում՝ երեւի նախկին որոշակի լրատվական բարքերի հետ է կապված՝ այս մեկին մի հատ սիրուն «ձեւենք», այս մեկը չնեղանա, բա որ ուղիղ եթերում մի ընդդիմադիր մի բան ասի, այս մեկը նեղանա: Հիմա այս տրամաբանությունը չկա, լիարժեք խոսքի ազատություն է, ես այդպես եմ տեսնում: Գրաքննություն չկա, հետեւաբար, խոչընդոտ չկա ուղիղ եթերի ծավալն ավելացնելու ու այդ մշակույթը ձեւավորելու համար»:
Նելլի ԲԱԲԱՅԱՆ
