«Նկատվում է հայերի վերադարձ Սիրիա»,-«Արմենպրես» լրատվական գործակալությունում ԶԼՄ-ների հետ հանդիպմանն այսօր հայտարարեց թուրքագետ, արեւելագետ Ռուբեն Սաֆրաստյանը:
Նա շեշտեց՝ օրերս տեղեկատվություն տարածվեց, որ Սիրիայի նախագահ Բաշար Ասածը պատրաստվում է վերականգնել ԻՊ-ի կողմից ավերված Դեր Զորի հայկական եկեղեցին. «Դա ցույց է տալիս, որ Սիրիայի իշխանությունները շահագրգռված են հայերի վերադարձով, «կանաչ լույս» են վառում նրանց համար: Իհարկե, բոլոր հայերը չեն վերադառնա, բայց, օրինակ, Լիբանանում հաստատված հայերի մեծ մասը, կարծում եմ, կվերադառնա Սիրիա: Գործընթացը սկսված է»:
Ինչ վերաբերում է սիրիական հակամարտության հանգուցալուծմանը, փորձագետը համոզմունք հայտնեց, որ այս տարում զարգացումներ են սպասվում. «Սիրիայում Թուրքիայի դերը կթուլանա, որը պայմանավորված կլինի Թուրքիա-ԱՄՆ առեւտրային, այդ թվում՝ զենքի ձեռքբերման շուրջ հարաբերություններով: Մյուս կողմից, լուծում կգտնի նաեւ սիրիայի քրդական հարցը: Արդեն նշմարվում է, որ քրդերը կստանան բավականին մեծ ինքնավարություն՝ Սիրիայի կազմում, մինչդեռ Սիրիայի սահմանադրությունը նախկինում ինքնավարություն չէր ճանաչում»:
Ռուբեն Սաֆրաստյանի խոսքով՝ քրդերի եւ Սիրիայի իշխանությունների միջեւ ներկա բանակցությունները, չի բացառվում, որ հենց այս տարի հանգեցնեն քրդական ինքնավարության ստեղծմանը. «Այն տարածքները, որտեղ ավելի շատ արաբներ են ապրում, այլ ոչ թե քրդեր, կվերադարձվեն Սիրիայի իշխանություններին: Այդպիսով, քրդերի վերահսկողության ներքո գտնվող տարածքների թիվը կկրճատվի»:
Լուիզա ՍՈՒՔԻԱՍՅԱՆ
