«Մանվել, տուշոնկա». Այս վանկարկումների ներքո այս պահին Վերաքննիչ քրեական դատարանի մոտ ցուցարարները Մանվել Գրիգորյանի կալանավորումն են պահանջում:
Դատարանում ներկայումս քննարկվում է դատախազության բերած բողոքը առաջին ատյանի այն որոշման դեմ, որով 25 մլն դրամ գրավի դիմաց Մանվել Գրիգորյանն ազատ էր արձակվել:
Ցույցի մասնակիցները, մասնավորապես, նախաձեռնողներից Ջիվան Աբրահամյանը սպառնում է՝ «եթե ռեժիմի նախկին մնացորդները հանկարծ այնպիսի որոշում կայացնեն, որ Մանվել Գրիգորյանի պես հանցագործին ազատ թողնեն, այդ ժամանակ կտեսնեն անհնազանդության ալիքը որն է: Կոչ ենք անում քառօրյային մասնակցած բոլորին, բանակով մտահոգներին, ովքեր տեսել են, թե Մանվել Գրիգորյանն ու իր կլանը ինչ տիպի է թալանել այդ բանակը՝ փամփուշտները, զենքերը, տուշոնկեքը, թող միանան մեր բողոքին: Թող գան այստեղ կանգնեն ու պահանջեն»:
Դիտարկմանը, որ պաշտպանական կողմն ասում է, որ Մանվել Գրիգորյանը առողջական այնպիսի խնդիրներ ունի, որոնք անհամատեղելի են կալանքի հետ՝ Ջիվան Աբրահամյանը պատասխանեց. «Միգուցե եւ առողջական պրոբլեմներ ունի, բայց մեր ամբողջ բանտերում մարդիկ են, որոնք լուրջ առողջական խնդիրեր ունեն ու դա հիմք չի հանդիսանում այդ մարդկանց ազատ արձակելու: Կա ավելի լուրջ խնդիր՝ հանրության համար վտանգավոր մարդուն թող հիվանդանոց պառկեցնեն՝ ոստիկանության հսկողության տակ: Հանրության համար վտանգավոր մարդուն ազատության մեջ թողնել, ինչ է առողջական խնդիրնե՞ր ունի, էսքան ժամանակ, որ ժողովրդին թալանում էր, առողջական խնդիրներ չունե՞ր»:
Հռիփսիմե ՋԵԲԵՋՅԱՆ
