ՀՀ պետական վերահսկողական ծառայության պետ Դավիթ Սանասարյանը հերքում է տեղեկությունները, թե իր մամուլի խոսնակ Զարուհի Մեժլումյանը ճնշումներ է գործադրել ցմահ ազատազրկված Մհեր Ենոքյանի ներման հարցին դրական եզրակացության տրման գործընթացի վրա:
Հիշեցնենք, որ Ենոքյանը դատապարտվել էր 22 տարի առաջ՝ մեղավոր ճանաչվելով Իոսիֆ Աղաջանովի սպանության համար: Նրա հայրը երեկ Զարուհի Մեժլումյանին առնչվող բաց նամակ էր հղել՝ մատնանշելով, որ նրա մտադրությունը կողակցին տուն վերադարձնելն է՝ արդարության շղարշի ներքո:
«Զարուհի Մեժլումյանը ՊՎԾ-ում աշխատանքային ժամերին վայրկյան անգամ որևէ այլ հարցով չի զբաղվել, նա կատարել է միայն իր պարտականությունները»,-վստահեցրեց Դավիթ Սանասարյանը, ապա նշեց, որ հպարտ է իր խոսնակի աշխատանքով. «Նա իր աշխատանքը բարձր որակով է կատարում, եւ դա մտնում է միայն Պետական վերահսկողական ծառայության գործառույթների մեջ»:
Ապա Սանասարյանն ակնարկեց. «Ես գիտեմ՝ ինչ «մանիպուլյատորներ» են փորձում սա անել: Երբ Զարուհի Մեժլումյանն աշխատանքի էր ընդունվում ՊՎԾ-ում, ասում էր, որ նման հարձակումներ են հնարավոր»:
Ինչ վերաբերում է տեղեկություններին, թե Դավիթ Սանասարյանն անձամբ ճնշել է ՀՀ արդարադատության նախարարությանը, որպեսզի Ենոքյանին ներում շնորհելու հարցում դրական եզրակացություն տրվի, պաշտոնյան վստահեցրեց. «Սա սուտ է: Ես որևէ պաշտոնյայի չեմ հրահանգել այս կամ այն դիրքորոշում հայտնել: Եթե փաստեր ներկայացվեն, ես հրաժարական կտամ եւ այլևս քաղաքականությամբ չեմ զբաղվի»:
Լուիզա ՍՈՒՔԻԱՍՅԱՆ
