ԲՀԿ խմբակցության պատգամավոր Նաիրա Զոհրաբյանին զարմացնում են մամուլի հրապարակումները, թե«Բարգավաճ Հայաստան» կուսակցությունը կրկնում է «Լուսավոր Հայաստան» կուսակցության նախաձեռնությունը` ԵԱՏՄ եւ տարածաշրջանային հարցերով հանձնաժողովի վերաբերյալ եւ ցանկանում է ղեկավարել այդ հանձնաժողովը:
«Բոլորս շատ լավ հիշում ենք, որ «Լուսավոր Հայաստան» կուսակցությունը եւ «Ելք» խմբակցությունն էր, որ կատաղի պայքար էին մղում ԵԱՏՄ-ի դեմ: Ավելին, ԵԱՏՄ-ից Հայաստանի դուրս գալը «Ելք»-ի նախընտրական ծրագրի առանցքային կետերից էր, նախորդ գումարման խորհրդարանում էլ «Ելք» դաշինքը հանդես էր եկել ԵԱՏՄ-ից Հայաստանի դուրս գալու օրենսդրական նախաձեռնությամբ եւ արտաքին հարաբերությունների հանձնաժողովի նիստում շատ ակտիվ հիմնավորում էին, թե ինչո՞ւ պետք է Հայաստանը դուրս գա ԵԱՏՄ-ից»,- Aravot.am-ի հետ զրույցում ասաց Նաիրա Զոհրաբյանը:
Մեր զրուցակցի համար այսօր առնվազն հասկանալի չէ, որ «Լուսավոր Հայաստանը» նման նախաձեռնությամբ է հանդես գալիս, ավելին, հավակնում է ղեկավարել այդ հանձնաժողովը:
Ինչ վերաբերվում է ԲՀԿ-ին եւ նրա հավակնություններին, Նաիրա Զոհրաբյանն ասում է. «ԲՀԿ-ն դեռ 2009 թվականից համագործակցության հուշագիր է ստորագրել ՌԴ-ում իշխող «Եդինայա Ռոսիա» կուսակցության հետ, ԲՀԿ-ի նախընտրական բոլոր ծրագրերում ԵԱՏՄ-ի եւ ՌԴ-ի հետ համագործակցությունը եղել է արտաքին քաղաքական գերակայություններից: Ուստի, միանգամայն տրամաբանական եւ հասկանալի է, թե ինչո՞ւ է ԲՀԿ-ն հադես գալիս ԵԱՏՄ եւ տարածաշրջանային համագործակցության հարցերով մշտական հանձնաժողով ստեղծելու նախաձեռնությամբ»:
Նախկին արեւմտամետ դաշինքի ղեկավարների իշխանության գալուց հետո Հայաստանի արտաքին քաղաքական գերակայության չփոփոխելուն Նաիրա Զոհրաբյանը դրական է վերաբերվում, քանզի կարծում է, որ Հայաստանը ՌԴ-ի եւ ԵՄ-ի հետ պետք է շարունակի վարել հավասարակշռված քաղաքականություն: Իսկ այդ գործիչների իմիջին ինչո՞վ կվնասի նրանց քաղաքական նախասիրությունների փոփոխությունը, իրեն չի մտահոգում: «Դրա մասին արդեն այդ գործիչները պետք է մտածեն»,- Aravot.am-ի հարցին այսպես պատասխանեց նա:
Արդեն կարծես հստակ է, որ մարդու իրավունքների պաշտպանության հանձնաժողովը վերաբացվելու է: Նախորդ գումարման խորհրդարանում այն միացվեց պետաիրավական հարցերի հանձնաժողովին: Ընդ որում, վերաբացված հանձնաժողովը բավական լայն լիազորություններ է ունենալու: Տարբեր վերլուծաբաններ շատ են կարեւորում, որ լայն լիազորություններով եւ վերահսկողական գործառույթ ունեցող այդ հանձնաժողովը ղեկավարի ընդդիմությունը:
Մամուլում հրապարակումներ կան, որ վերաբացված հանձնաժողովը ղեկավարելու է Նաիրա Զոհրաբյանը: Իր ղեկավարած նախորդ`Եվրոպական ինտեգրացիայի հանձնաժողովը, իշխող «Իմ քայլը» դաշինքը վերցնում է իրեն: Իսկ նոր ստեղծվելիք ԵԱՏՄ եւ տարածաշրջանային ինտեգրացիայի նորաստեղծ հանձնաժողովը կղեկավարի ԲՀԿ-ական, ԱԺ նախկին փոխնախագահ Միքայել Մելքումյանը:
Նաիրա Զոհրաբյանն այս մասին մեկնաբանություններ չի անում: «Խորհրդարանը կսկսի աշխատանքը`պարզ կլինի»,- ասաց նա:
Նելլի ԳՐԻԳՈՐՅԱՆ
