Սփյուռքի նախկին նախարար, «Իմ քայլը» խմբակցության պատգամավոր Մխիթար Հայրապետյանին Aravot.am-ը հարցրեց՝ մամուլում ձեզ քննադատում էին, որ եթե ՀՀԿ-ն աներձագ-բաջանաղներին է բերում ԱԺ, դուք էլ ձեր կուրսին եք բերել ԱԺ: Մխիթար Հայրապետյանի կուրսեցիներից «Իմ քայլի» ցուցակով առաջադրվել էին Գեւորգ Պետրոսյանը, Վաղարշակ Հակոբյանը, պատգամավորական մանդատ ստացավ ինքն ու Հակոբյանը: Հայրապետյանը պատասխանեց՝ «Եթե կուրսով ԱԺ գալ ասելով նկատի ունեք երկու հոգու, ասեմ, որ Վաղարշակ Հակոբյանը, ինչպես եւ ես, ընտրվել է ռեյտինգային ընտրակարգով Կոտայքի մարզում: Նա չի զբաղեցրել բարձր հորիզոնական համամասնական ցուցակում, եթե չեմ սխալվում 176-ն էր ցուցակում: Բացառապես իր իրականացրած քարոզարշավի, նաեւ 8 ամիսների գործունեության շնորհիվ է, որ ստացել է 4000-ից ավելի քաղաքացու վստահության քվե եւ բացառապես դրա շնորհիվ է, որ Վաղարշակ Հակոբյանն այսօր ԱԺ-ում է ներկայացված: Իմ մասով էլ գիտեք, ես թիվ 1 ընտրատարածքում էի առաջադրված, ռեյտինգային ընտրակարգով եմ ստացել քաղաքացիների վստահությունը: Սա եւս խոսում է, որ մեր՝ գործադիրում իրականացրած աշխատանքը որոշակիորեն գնահատվել է հանրության կողմից»:
Մենք նաեւ հարցրեցինք՝ Արամ Ա կաթողիկոսը մտահոգություն էր հայտնել, որ սփյուռքի նախարարության լուծարումը սփյուռքում լուրջ դժգոհությունների տեղիք կտա, դուք այդ մտահոգությունը կիսո՞ւմ եք՝ Մխիթար Հայրապետյանը պատասխանեց. «Ոչ միայն Արամ Ա կաթողիկոսը, այլ նաեւ սփյուռքում բազմաթիվ համահայկական կառույցներ, անհատներ, կուսակցական կառույցներ, հիմնադրամներ բոլորն էլ մտահոգություններ հայտնել են, որոնց վարչապետ Նիկոլ Փաշինյանը պատասխանեց, որ մենք ստեղծում ենք մի այնպիսի մոդել, որը թույլ կտա ոչ միայն պահպանել, այլեւս ավելի էֆեկտիվ դարձնել սփյուռքի հետ աշխատանքները: Մենք եւս ունենք մտահոգություններ: Մեզ համար չափազանց կարեւոր է, որպեսզի այն գործառույթները, որ իրականացրել է մեր գերատեսչությունը, պահպանվեն, նաեւ ժառանգականությունը ապահովեն: Մեր նպատակն է, որ կարողանանք հասկանալ, ստեղծել մի այնպիսի մոդել, որոնք թույլ կտան սփյուռքի հետ կապված գործառույթները լավագույնս իրականացնել»:
Մանրամասները՝ տեսանյութում:
Հռիփսիմե ՋԵԲԵՋՅԱՆ
