ՀՀ Մարդու իրավունքների առաջին պաշտպան Լարիսա Ալավերդյանը Ղազախստանի Կարագանդա քաղաքում տեղի ունեցած ծեծկռտուքը չի կապում ոչ քաղաքականության ոչ ՀԱՊԿ-ի հետ: Ըստ նրա՝ Ղազախստանում նման կրիմինալ կռիվներ մշտապես եղել են, բայց այս անգամ նորություն էր, որ վեճին մասնակցած հինգ-վեց ազգության ներկայացուցիչներից միայն հայերի ազգանունները շրջանառվեցին:
«Ուշադրության է արժանի այն հանգամանքը, որ կռվին մասնակից ադրբեջանցիների ազգանունները փոխարինվել են հայերի ազգանուններով, սա, թերևս, մտահոգիչ է: Իսկ ինչ վերաբերում է ազգությամբ հայ Նարեկ Գուրուրյանին, ապա նա այս պահին գտնվում է ՌԴ-ում, որտեղ հանդիսանում է օտարերկրացի, քանի որ չունի այդ երկրի քաղաքացիություն։ ՌԴ-ի և Ղազախստանի միջև կա ստորագրված կոնվենցիա, որտեղ հստակեցված է, որ օտարերկրացիներին այդ կոնվեցնիայի համաձայն, ՌԴ-ն պետք է արտահանձնի Ղազախստանին՝ բացառությամբ այն կետի, երբ կա մտահոգություն, որ անձին արտահանձնելով՝ հնարավոր է նրա նկատմամբ սկսվի հետապնդում ազգային, ռասսայական և այլ հատկանիշներով։ Այս դեպքով կա արդյոք նման հիմք, դեռ պետք է ապացուցվի։ ՌԴ-ն կարող է միայն այս կետը հիմք ընդունել և Նարեկ Գուրուրյանին չարտահանձնել՝ հիմնվելով միջադեպից հետո ծավալված զարգացումների վրա»,-այսօր «Տեսակետ» ակումբում ասաց Լարիսա Ալավերդյանը:
Հարցին՝ հնարավո՞ր է Ռուսաստանը չարտահանձնի հայ երիտասարդին Ղազախստանին՝ հաշվի առնելով Ղազախստանի հետ ունեցած հարաբերությունները, Լարիսա Ալավերդյանը պատասխանեց. «Ավելի հավանական է, որ լինելով Ղազախստանի հետ բավական բարձր մակարդակի դրական հարաբերությունների մեջ, Ռուսաստանը կգերադասի չմտնել ավելորդ բարդությունների մեջ և կարտահանձնի այդ անձին»:
Արփինե ՍԻՄՈՆՅԱՆ
