«Ես վստահ եմ, որ նոր խորհրդարանը կցրի Արմեն Աշոտյանի բոլոր մտահոգությունները». Ռուբեն Ռուբինյան

«Իմ քայլը» խմբակցության անդամ Ռուբեն Ռուբինյանն ասաց, որ նոր ԱԺ-ում փորձառուների եւ երիտասարդների լավ համադրություն է լինելու ու դա լավ հնարավորություն է տալու որակյալ ու արդյունավետ աշխատանքի համար: Լրագրողները հարցրեցին՝ խորհրդարանը եղել է հիմնականում կառավարության բերած նախագծերն ընդունող մարմին, հիմա նո՞ւյնը սպասենք, դուք ունե՞ք օրենսդրական նախաձեռնությունների գաղափարներ՝ պատասխանեց, որ որոշակի մտահղացումներ ունի, բայց այսօր դրանց մասին չի խոսի:

Հարցին՝ դուք առաջադրվելու եք՝ որպես ԱԺ արտաքին հարաբերությունների մշտական հանձնաժողովի նախագահ, բարդ չի՞ լինելու այդ հանձնաժողովի աշխատանքները համակարգել ու կարելի՞ է ենթադրել, որ եթե ընտրվեք, ղեկավարելու եք նաեւ ԵԽԽՎ-ում հայկական պատվիրակությունը՝ Ռուբինյանը պատասխանեց. «Ցանկացած պետական աշխատանք թե՛ գործադիրում, թե՛ օրենսդիրում բարդ է, բայց ես պատրաստ եմ աշխատել»:

Ինչ վերաբերում է ԵԽԽՎ պատվիրակությունը ղեկավարելուն, նա ասաց, որ առաքելությունների կազմերը դեռ հստակեցված չեն, հետեւաբար զերծ կմնա մանրամասնելուց:

Արմեն Աշոտյանը մտահոգություն էր հայտնել, որ 2019-ին ՀՀ-ԵՄ համաձայնագիրը չեն հասցնի վավերացնել՝ Ռուբինյանն ասաց, որ գործընթացի կասեցման վտանգ չկա. «Ես վստահ եմ, որ նոր խորհրդարանը կցրի Արմեն Աշոտյանի բոլոր մտահոգությունները»:

Մեր հարցին՝ Արմեն Աշոտյանը նաեւ հայտարարում էր, որ այս իշխանությունների աքիլլեսյան գարշապարը եւ ամենամեծ սխալները արտաքին քաղաքականության հարցում են, համաձա՞յն եք այդ գնահատականի հետ՝ Ռուբեն Ռուբինյանը պատասխանեց. «Ես չեմ կարծում, որ այս հարցուպատասխանում պետք է այդքան ժամանակ հատկացնել նախկին իշխանությունների ոչ այնքան տրամաբանական գնահատականներին»:

ԱԺ ընդդիմադիր փոխխոսնակի հարցով Ռուբինյանն ասաց, որ Նիկոլ Փաշինյանի բերած փաստարկը, որ պետք է լինի մեծ ընդդիմադիր խմբակցության պատգամավորը, փաստարկներից մեկն է, բայց կարող են լինել նաեւ այլ փաստարկներ: Նա ասաց, որ խմբակցությունում կքննարկեն ու տրամաբանական որոշման կգան: Հարցին՝ վարչապետի խոսքը ուղղորդիչ չէ՞ «Իմ քայլը» խմբակցության պատգամավորների համար՝ Ռուբինյանը պատասխանեց, որ խմբակցության ցանկացած անդամի խոսքն էլ ինչ-որ չափով ուղղորդիչ է մյուսների համար, բայց որոշումը ի վերջո կայացվելու է խմբակցությունում:

Հռիփսիմե ՋԵԲԵՋՅԱՆ