«Երեկ լուրերի թողարկումից իմացա, որ կովկասյան հովազը արձագանքել է այս տարին իր անվամբ կոչելու մեր որոշմանը»,-այսօր կառավարության նիստի օրակարգը սպառվելուց հետո ասաց վարչապետի պաշտոնակատար Նիկոլ Փաշինյանը: Նրա այս խոսքերը հարուցեցին նիստի մասնակիցների ծիծաղը: «Արձագանքել է մեր որոշմանը եւ ընկել է թակարդը՝ տեսախցիկ-թակարդը»,-շարունակեց Փաշինյանը: Նա դիմելով բնապահպանության նախարարի պաշտոնակատար Էրիկ Գրիգորյանին, ասաց, որ իմացել է՝ կովկասյան հովազի վերաբերյալ կա մի առանձնահատուկ ծրագիր:
Գրիգորյանը ներկայացրեց թե դա ինչ է՝ ԱՄԷ-ի նախարարների հետ հուշագիր են ստորագրելու. այդ երկիրը կենդանիների բազմացման լավ փորձ ունի: Գրիգորյանն ասաց, որ այդ ծրագիրը վերաբերում է կովկասյան ընձառյուծի բազմացմանը:
Փաշինյանը հետաքրքրվեց՝ ճշգրիտ անունը կովկասյան ընձառյո՞ւծ է, թե՞ հովազ: Նախարարի պաշտոնակատարն ասաց՝ «Պատմականորեն հովազ է, բայց տարբեր անուններ կան՝ կովկասյան, առաջավոր ասիական, պարսկական»:
«Հայկական չկա՞»,-հարցրեց Փաշինյանը:
«Կա հայկական մուֆլոն»,-պատասխանեց Գրիգորյանը: Ու կառավարության անդամները կրկին լիաթոք ծիծաղեցին:
Հետո Փաշինյանն անդրադարձավ որսագողությանը, նշելով նաեւ Սեւանա լճում որսագողությունը, նկատելով՝ ամենուրեք ազատ սիգ է վաճառվում. «Ահազանգ եմ ստացել այն մասին, որ ի հեճուկս որոշումների, Սեւանի սիգի որսի հետ կապված 100 տոկոսանոց բարձիթողի վիճակ է, է՛լ չեմ ասում, որ լուրերով ցույց են տալիս, որ մեր բոլոր շուկաներում վաճառվում է Սեւանի սիգ։ Այս հարցի հետ կապված քանի անգամ քննարկում ենք ունեցել, սակայն էստեղ մենք պետք է մտածենք խնդրի երկարաժամկետ լուծման մասին»:
Փաշինյանն ասաց, որ զեկուցագիր է ստացել, որտեղ նշված է մի շարք գերատեսչությունների թերացումների մասին, այդ թվում բնապահպանության նախարարության, ոստիկանության եւ «Սեւան» ազգային պարկի։
Էրիկ Գրիգորյանն էլ ասաց, որ իրենք էլ են ահազանգեր ստանում, կան հարուցված քրեական գործեր: Ապա Գրիգորյանը քաղաքացիներին կոչ արեց ապօրինի որսագողության դեպքերով ահազանգել:
«Ես ահազանգում եմ այդ թեմայով»,-ասաց Փաշինյանը: Նրա այս խոսքերը կրկին ծիծաղ առաջացրեցին կառավարության անդամների մոտ:
Նելլի ԲԱԲԱՅԱՆ
