Մայրաքաղաքի աղբահանության կազմակերպման հարցը հատկապես քննարկման առարկա դարձավ Երեւանի ավագանու ընտրության օրերին, հետո արդեն` ավագանու նիստերին, ամանորյա տոներին ու մինչ օրս էլ շարունակվում է: Ավագանու անդամները, Երեւան քաղաքի իշխանությունները շրջանառության մեջ դրեցին երկրորդ, երրորդ օպերատոր ներգրավելու հարցը, որպեսզի մրցակցություն լինի, եւ քաղաքն ի վերջո աղբից մաքրվի: Սակայն երբ չկա աղբը հավաքելու հստակ մեխանիզմ, որով կիրականացվի աղբահանությունը, Երեւանն աղբից չի ազատագրվի` անկախ այն բանից, թե քանի օպերատոր ունենք:
Օրինակ` Երեւանի Կասյան, Հակոբ Հակոբյան եւ այլ կենտրոնական փողոցներով օրը մի քանի անգամ աղբահավաք մեքենաներ են անցնում, սակայն աղբամաններից դուրս կուտակված աղբը ամիսներով չի հեռացվում: Այսպիսի տեսարաններ մայրաքաղաքում շատ կան: Մայրաքաղաքով մեկ տարածված սոցիալական գովազդները հորդորում են` աղբի տեղն աղբամանում է, բայց երբ աղբամանները բացակայում են, աղբը հայտնվում է փողոցում: Թումանյան փողոցի վերգետնյա անցումի տակ դարսած այս աղբամանները (լուսանկարում) ապացույցն են այն բանի, որ աղբամանի դեֆիցիտ չկա, պարզապես աղբահանության համակարգն է կաղում:
Լուսանկարները` ԼՈՒՍԻՆԵ ԲՈՒԴԱՂՅԱՆԻ
«Առավոտ» օրաթերթ,
09.01.2019
