Յուրի Իսրայելյանը՝ իր կարիերայի մասին
Ձյուդոն ինքնապաշտպանության ճապոնական համակարգ է, որում մարդը պաշտպանվելու համար օգտագործում է հակառակորդի ուժը: Հայաստանում ձյուդո ըմբշամարտը սկսել է զարգանալ 1972թ.-ից: Տյումենում ձյուդոյի միջազգային կարգի մրցաշարում 1-ին հորիզոնականը գրաված Յուրի Իսրայելյանն ասում է, որ հաղթանակն իրեն տրվել է համառ բնավորության շնորհիվ:
Տյումենում կայացած ձյուդոյի միջազգային մրցաշարում հաղթող Յուրի Իսրայելյանը պատմեց իր անցած ճանապարհի, դժվարությունների, սպորտաձեւը ապրելակերպ դարձնելու մասին: Յուրիի համար 1-ին հորիզոնական գրավելը եղել է բաղձալի նպատակ, չնայած նրան, որ ունեցել է բազում պարտություններ, չի հուսահատվել եւ գնացել է դեպի իր բաղձալի նպատակը:
Աշխարհում կան շատ սպորտաձեւեր, բայց Յուրին ձյուդո սպորտաձեւով դեռ մանկուց է տարված: Առաջին անգամ ձյոդոյի պարապմունքի հաճախել է ընկերների հետ: Ասում է, որ այս սպորտաձեւի մեջ իրեն լավ է զգում:
Մասնակցել է Միջազգային կարգի մրցաշարերի, Եվրոպայի գավաթների, Աշխարհի առաջնության եւ Պատանիների օլիմպիական խաղերին: Յուրին նշեց, որ Իտալիայում Եվրոպայի գավաթի մրցաշարում գրավել է 2-րդ հորիզոնականը, Իսպանիայում եւ Պորտուգալիայում 3-րդ հորիզոնականը, իսկ Տյումենում կայացած միջազգային կարգի մրցաշարում 1-ին հորիզոնականը:
Յուրին ասում է, որ ունեցել է բազում պարտություններ, բայց չի հուսահատվում եւ ձգտում է առավելագույնին: 2018-ին Պատանիների օլիմպիական խաղերում պարտվելուց հետո իր առջեւ նպատակ է դրել մասնակցել 2024թ. Օլիպիական խաղերին եւ բերել ոսկին:
Այն հարցին, թե ինչ է իր համար սպորտը, Յուրին պատասխանեց. «Սպորտը կարող է եւ օգտակար լինել, եւ վնասկար: Կախված նրանից, թե ինչ սպորտով ես զբաղվում, ինչքան ջանք ես ներդնում եւ որքան ժամանակ ես տրամադրում: Սպորտում տիրում է «Հաղթիր ամեն գնով» ոգին, եթե կա արյանդ մեջ, չես կարող դրան դեմ գնալ»:
Նրա խոսքերով, բոլորն էլ ունեն մոտիվացիայի աղբյուր, հանուն որի՝ արժի է հասնել առավելագույնին: Իսկ ո՞ւմ է շնորհակալ Յուրին այսօրվա իր հաջողությունների համար: «Դու ես քո օգնականը: Հասկացել եմ մի բան՝ եթե ինքդ քեզ չօգնես, ապա ոչ մեկը չի օգնի», -համոզված է մարզիկը, որը սպորտով հետաքրքրվող մարդկանց խորհուրդ է տալիս երբեք չհանձնվել:
ԱՆԺԵԼԻԿԱ ՈՍԿԱՆՅԱՆ
«Առավոտ» օրաթերթ,
09.01.2019
