Օրերս «Anonymus» անվամբ ցանցահենների խումբը հրապարակել էր փաստաթղթեր բրիտանական նախագծերից մեկի արխիվից, ըստ որի՝ հայաստանյան մի շարք հայտնի փորձագետներ որակվում են որպես «ռուսական քարոզիչներ» եւ «ռուսական շահերի ներկայացուցիչներ»: Նրանց թվում է քաղաքագետ, ՀՀ նախագահի խորհրդական Թեւան Պողոսյանը: Aravot.am-ի հետ զրույցում նա համոզմունք հայտնեց, որ նման հրապարակումներին պետք չէ լուրջ վերաբերվել, եւ տեղեկատվությունը նախեւառաջ պետք է ստուգել:
«Իմ քսան տարվա գործունեությունը հայտնի է, իմ բոլոր ելույթներն ու հարցազրույցները հասանելի են հասարակությանը, ուստի թող վերջինս ինքը դատի»,-նկատեց Թեւան Պողոսյանը: Ըստ նրա՝ ներկայումս տեղեկատվական պատերազմի փուլում ենք, երբ թշնամիները փորձում են նման հրապարակումներով հանրային կարծիքներ եւ տրամադրություն ձեւավորել:
«Չպետք է թույլ տալ, որպեսզի դրսի կամ ներսի այս կամ այն ուժերը մեր հանրության շրջանում տրամադրություններ ձևավորեն: Այդ ցուցակում հիմնականում ընդգրկված են հանրային գործիչներ: Նրանց բոլորի դիրքորոշումն էլ մարդկանց հայտնի է: Եթե հանրությունն այդ ամենի հիման վրա չի ձևավորելու իր կարծիքը, այլ հիմնվելու է ինչ-որ Anonymus-ի ցուցակի վրա, ուրեմն՝ լուրջ խնդիր ունենք»,-եզրափակեց Թեւան Պողոսյանը:
Հիշեցնենք, որ ցուցակում ընդգրկված փորձագետներից Ջոնի Մելիքյանը եւ Վահրամ Տեր-Մաթեւոսյանն արդեն մեկնաբանել են ցանցահենների հրապարակումը:
Լուիզա ՍՈՒՔԻԱՍՅԱՆ
