Հայտնել ենք 2018 թվականի դեկտեմբերի 9-ին «Դիլիջան» ազգային պարկի տարածքում 15 ծառ հատվելու եւ վնասվելու եւ այդ կապակցությամբ կատարվող քննության մասին:
Ոստիկանության Դիլիջանի բաժնի աշխատակիցները՝ բաժնի պետ Սեւակ Բադիրյանի գլխավորությամբ, քննություն կատարելով բացահայտել են այդ ծառերը հատողին: Դիլիջան համայնքի կազմի մեջ մտնող Թեղուտ գյուղի 33-ամյա բնակիչը ինքնախոստովանական ցուցմունք է տվել, որ այդ ծառերի հատումները գիշերով միայնակ կատարել է ինքը: Նա հատումները կատարել է լուսավորման սարքը գլխին, ինչպես հանքահորներն են աշխատում հանքում:
Այդ տարածաշրջանի ապօրինի ծառ հատողների մեջ սովորույթ կա թաքուն մեկուսի տեղում հատումներ կատարել, որոշ ժամանակ անց դրանք ազգային պարկի աշխատակիցներին ներկայացնել իբր իրենց կողմից պատահաբար անտառում հայտնաբերված հատված ծառեր:
Ապօրինի ծառահատումների դեպքի վերաբերյալ քննությունը շարունակվում է:
Ոսկան ՍԱՐԳՍՅԱՆ
Խմբ. ՀՀ ոստիկանության տարածած հաղորդագրության համաձայն՝ «Հունվարի 8-ին ծառահատումներ անելու կասկածանքով բաժին է հրավիրվել Թեղուտի բնակիչ, 1985 թվականին ծնված Գագիկ Ղ.-ն: Նա ինքնախոստովանական բացատրություն է տվել, որ 2018թ. նոյեմբերի 29-ին նշված ծառահատումը կատարել է ինքը»:
