«Խամ» վարորդի խրոնիկները. ամիս 1

Վարորդների համայնքը ներառական չէ, եթե նորեկ ես, սովորաբար, պետք է կա՛մ փորձ ձեռք բերես (այսինքն՝ էլ նորեկ չլինես), կամ էլ մեծ-մեծ խոսես: Իսկ «խամ, աղջիկ վարորդը» իսկական դժբախտություն է, այս արտահայտության հեղինակային իրավունքները ինձ չեն պատկանում, բայց լսել եմ բազմիցս տարբեր մարդկանցից: Հավատացե՛ք, շատ դժվար է ապրել այն «գիտակցությամբ», որ դու փորձանք ու դժբախտություն ես, նամանավանդ այն դեպքում, երբ շատ ես ուզում այդպիսին չլինել: Բայց ինչ արած, ոչինչ չեմ կարող փոխել՝ ես աղջիկ եմ, ու «խամ» վարորդ:

Շատ ժամանակ չի անցել, ինչ վարորդական իրավունք ստացա, գրեթե մեկ ամիս: Վարորդական իրավունքի վկայականը ստանալու հաջորդ օրվանից վարել եմ, բայց համարձակությունս և առողջությունս չէր ներում, որպեսզի մենակ վարեմ: Այդ իսկ պատճառով խնդրում էի ընկերոջս միանալ և մասնակից դառնալ իմ դաժան փորձություններին: Մինչև վարորդական իրավունք ստանալը երկու ամիս վարել եմ ուսումնական մեքենա, բայց այլ բան է, երբ կողքդ նստած է մասնագետ, որը յուրաքանչյուր պահի կարող է արգելակել և հետ պահել բազմաթիվ փորձանքներից, ուրիշ բան է, երբ ամբողջ պատասխանատվությունը քեզ վրա է:

Եթե ինձ նման որոշել եք մենակ չերթևեկել, ապա պատրաստ եղեք պարբերաբար մունաթներին, գոռգոռոցներին ու քննադատություններին: Իսկ եթե դուք մի օր նստեք ուղևորի աթոռին, խնդրում եմ մի արեք էդպես, հավատացե՛ք այդպես ավելի վտանգավոր իրավիճակներ եք ստեղծում, և մի նեղվեք նորեկ վարորդի ագրեսիվ արձագանքից:

Այս ընթացքում երկու անգամ եմ մենակ մեքենա վարել. այնքան վախենալու չէր, որքան ես էի պատկերացնում: Բայց ամեն անգամ տուն հասնելուց վախը չափելու ու շաքարաջուր խմելու խիստ կարիք էի ունենում: Հիմա կասեք՝ եթե վախենում ես, մի՛ քշի, հավատացե՛ք հենց այդ պահին ես չէի վախենում, բայց երբ մտովի պատկերացնում էի, որ այսքան ճանապարհ եմ անցել, ինչ դժվարություններ եմ հաղթահարել, իրոք վախենալու էր:

Աղջիկները կայանել չգիտեն, բայց պատահում են էնպիսի աղջիկներ, որ տղայից էլ լավ են կայանում: Այս արտահայտության հեղինակային իրավունքները, բարեբախտաբար, ևս իմը չեն.  հարցրեք գրեթե բոլոր տաքսիստներին ու կլսեք այս արտահայտությունը: Չեմ ասում՝ այս գործում աս եմ, բայց մեր բակում կամ այն վայրերում,  որտեղ սթրեսի ենթարկվելու հավանականությունը քիչ է, կարողանում եմ նորմալ կայանել մեքենան, լինում է նաև՝ առաջին անգամից ստացվում է: Իսկ երբ մարդաշատ ու մեքենայաշատ վայր է, միայն այդ փաստը հերիք է, որ ես մի քանի սխալ իրար հետևից կատարեմ: Բայց բարեբախտաբար, գտնվում են մարդիկ, որոնք առանց խնդրելու միանգամից հայտնվում են այդ վայրում ու օգնում են տեղավորվել: Հատուկ շնորհակալություն հենց այդ մարդկանց, անչափ շնորհակալ եմ, բայց խնդրում եմ՝ հետո չասեք՝ մի աղջիկ էր, չէր կարողանում մեքենան կայանել, ես դրանից շատ կնեղվեմ, որովհետև չնայած բազմաթիվ այլ դեպքերի, երբ նույնիսկ ես եմ ծիծաղում, այդ աղջիկը ես եմ:

Կան նաև այլ մարդիկ, որոնք աշխատում են կայանատեղերում, ու ենթադրվում է, որ նաև պետք է օգնեն, բայց որոնք, ի տարբերություն իրենց նախաձեռնության օգնող քաղաքացիների՝ բացահայտ սեքսիստ են: Իրենց պատճառով ես հաճախ ինձ ստորացած եմ զգում, չեմ ուզում ընդհանրապես մեքենա վարել ու քիչ է մնում արդեն հայտարարություն գրեմ, որ վաճառում եմ մեքենաս (մի անգամ նույնիսկ տեքստը գրել պատրաստել էի, մնում էր միայն մեկ քլիք և վերջ, բայց ինչ մեղքս թաքցնեմ, չհամարձակվեցի): Դեպքերից մեկը, մոլերից մեկի կայանատեղում էր, երբ փորձում էինք կայանելու տեղ գտնել, մի հրաշալի անձնավորություն, դիմելով ուղևորի աթոռին նստած ընկերոջս ու արհամարհական նայելով իմ կողմ, մի քանի անգամ կրկնեց՝ «ապե՛, չէիր կարա դու քշեիր»: Եթե Դուք հանկարծ կարդում եք, իմացե՛ք, Դուք փչացրել եք իմ օրը, ու ընդհանրապես պետք չէ այդպես անել:

Ես հավատում եմ, որ սովորելու համար պետք է սխալներ կատարել: Առանց սխալներ կատարելու համ կյանքն է անհետաքրքիր դառնում, համ էլ փորձ չես ձեռք բերում: Սրանով չեմ արդարացնում իմ կատարած սխալները, ուղղակի փորձում եմ դրանցից դաս քաղել ու չկրկնել: Ուզում եմ շնորհակալություն հայտնել այն վարորդներին, որոնք հանդուրժող են եղել իմ նկատմամբ, ու մեղմ են վերաբերվել իմ սխալներին, ներողություն եմ հայտնում բոլոր նրանցից, ում նյարդայնացրել եմ ու դեռ կնյարդայնացնեմ (այստեղ խոսքը բարեխիղճ վարորդների մասին է). խոստանում եմ՝ ես կուղղվեմ:

Ամի ՉԻՉԱԿՅԱՆ